Addis Ababa:- Dagate riqiwamaano amaale mini maakissanyote barra harisino 7ki uurrinshu songonni Itophiyunna Turkete mootimma mereero assinoonniha olaantote wodho sumuumme, olaantote faynaanise halama sumuummenna faynaanisete irko gumulsiinsanni pirootokoole buuxe kaajjishshi.
Itophiyunna Turke olaantote halama assate dandiisannonsaha olaantote wodho sumuumme wocawaajje 12/ 2o13 M.Dnni Turkete Hankaara quchumira malaatissinoti qaangannite.
Sumuumme lamente gobbuwa mereero gargarooshshu handaarinni assinanni xaadooshshi massagamannoha xawado wodho kalaqate illachishshinote.
Lallawu, gargarooshshu industirenni, mashalaqqete soorri’ra, loojestikise, fayyimmate owaante, mashalaqqete amanyootenna sayberete gano gargarooshshinna woloota amadisiisantino loossa aana halamatenni loosate dandiissanno wodho mitteenni amadinoho.
Konninino ogeeyyenniha, uduunnunniha, mashalaqqetenna rosichu soorri’ra sumuummete garinni loosate dandiisanno.
Ledoteno gargarooshshu halama loossa lainohunni lamente gobbuwara rosunninna qajeelshunni addinni woy gutunni qixxaabbanno olaantote qajeelshubba beeqqate dandiisanno.
Sumuumme, Itophiyu gargarooshshu industire uduunne, loojistiikisete shiqishonna irkubba afidhanno gede hattono mannu wolqanna gashshootu ragaanni rosicho adhitanno gede kaa`lannotano hatto.
Itophiyunna Turkete mereero assinoonnihu olaantote faynaansete ha`lama sumuumme lamenti gobbuwa gutunni loosate dandiisannonsaha ikkinota xawinsoonni.
Amaalete mini fayinaansete irko gumulsiinsanni pirootokoole lallawubba lede sumuummubba Itophiyaho afisiissanno horo aana hasaawatenni wo`ma huuronni kaajjishshino.
Wole widoonni amaalete mini Itophiyunna Kalqoomu giwirinnu latishshi fende mereero baadiyyete fayinaanse amanyooti woyyaambe qixxaawo gumulsiisate assinoonniha liiqoote sumuumme 3 giwaanonni, 8 sammiimaanonni; roortino huuronni kaajjishinota Itophiyu odoote owaante odeessitino.
Abbebech Maatewoos
Bakkalcho Onkoleessa 11, 2014 M.D
