Manchi beetti fayyimmaranna keeraanchimmara sagale saga`la doorshu nooikkite. Ikkollana kaayinni, mite mite sagalete dani qoropho nooikkiha saga`liniro fayyimmate qarra abbitanno. Intanni sagale baala fayyimmankera horo uytannorono bikkunni naleenni horoonsi`raw ole qarra abbitanno. Gati laalonna hattoo labbannore duucha yannara horoonsi`ra fayyimmankera xagete. “Dhiwamme qaarammankunni balanxe qorophino” yaanno gobbanke manni. Konnira, Konne gati laalonna kaayshsho saga`linanni meesaneetenke xagisi`no. Ledinoha, Fayyimmankeranna bisinkera jawa horo aannoha gatu laalinna kaayshshu horo konni woroonni shiqino garinni la`no. Dancha niwaawe !
Paappayyu Horo:-Reytino gogu seella haayishshe hoolate kaa`lanno; gogu moolle gargaranno. Pappaayya gogu aana buuratenni woy itatenni biifannoha shaqqado goga afi`ra dandaanno. Daankoonni Paappayye daddadhaminoha lekkate hoowo xagisate kaa`lanno. Godowu da`muulla xagisate horo aanno. Bisu aana fulannoha koliddaricho bussi bussi yee fulinoha hunate, geedhimmate malaatta ajishshatenna xagisate kaa`lanno. Yanniweelo umu baddannoikki gedeenna danancho aajjishate horo aanno.
Loome:-baakiteerya shitanno wolqa noose. Vaaytaamine s noose. Huuncinoonni loome way ledo karsine aga bisinke asiidete alkaalayne taalo ikkitanno gede kaa`lanno. Afalete looso kakkaase yuurikete asiidenna woloota gawajjitannore giddo amaddino seella hunatenna dombophichote du`namaancho seekke xagisanno; du`namaanchu kaajjannoikki gede assanno. Huunchinoonni loome vaaytaamini P nni wo`minohura seella gawajantannoikki gedenna geedhimmate yannara kalaqantanno Firi-raadikaaloota hunate kaa`litanno. Huuncinoonni loome kaansereno amaddannoikki gede gargartanno. Geedhimmate yannara daannoha erammete basera kalaqantanno dhibba hoolanno. Loomete giddo noohu pikitini yinanni faybere kolistiroolete bikka ajishate aleenni hude huntanno daafira lowo sagale saga`la hooltanno.
Habaabe:- Mannimmankera lowo gede hasiissanno vaaytaamine, shiilonna batirikkinni bisinkera ikkanno bikki garinni kaaloore amadinoho addintanni banxanni laalchooti.Kee`mille xesirate, sukkaarete dhibbinni gargadhate, wodanu dhibbi qarra, bisoho iibbillenna wolqa ledate, keeraancho dananchu lophora, sagale daahatenna bisu moolle gargarate, hattono mundeete xiiworano xagisirate kaa`lanno. Habaabi ita wole horosi guluchu woroonni kalaqantanno mundeete doycho woy xiiwo huna dandaanno. Kaanserete, bisu aana kalaqamannore hasiissannoikkirichu hunate horo aanno. Wolu Habaabi horo, vaaytaamini s inni wo`mino daafira kaanserete reqecci yaa gargaranno xiinxallo leellishanno.
Qaariya:-Vaaytaamine A qaariyu giddo heedhannote. Illete isilanchimmaranna eeraanchimmate luphiima qeecha afi`rino daafira qaariya saga`la lowo horo uytanno. Qaariyu vaaytaamine S inni wo`mino daafira goganke keeraanchonna xawinoha assanno. Dhibba gargarate wolqa noosi. Sagale daahantanno gede irkisanno. Ganshu,buusano hatono shonbu kaansere gargarate kaa`lanno. Miqichu fayyimmanna kaajjillira addinta horo aanno. Mannimankera horo uyannoikki seella hunatenni faayberete buicho ikke godowu moolle gargaranno. Qaariya ittanno mannooti goginsa qoorre hoolanno. Rakke geedhitannoikki gede assate kaa`lanno.
Avokaado:-Manniman ke giddo noo kolistiroole ajishate taalaasihu dino. Giddosiinni amadinohu vaaytaamini I wodanu dhibbira woy umu giddo mundee fincantannoikki gede kaa`lanno. Geedhimma gargaratenna gogu biibfille seekke aga`ranno. Avokaadote giddo hamate hee`rannohu (anti oxidant) gogu qoorannoikki gedena reytinnori gogu seella uminsa umonsa riqqibbanno gede irkisatenni Kaarootinaydisi yinanni nixire coye gogu aana leeltannore gogu biinfille ajjishanno malaatta kalaqantannoikki gede assanno. Qelpheepho ajishate wolqa noosi. Sukkaarete dhibbira xagichoho. Avokaadote giddo nooti potaashiime mundeete giddo noo gulukoosete bikka taashshatenni sukkaaretenna wodanu looso geinnoha assanno.
Duumo Shunkurta:- Mannimmanke dhibbunni gargarate wolqa lossanno; giddoyinni kirumiyemi yinanni nixire coyee afi`rino. Tini nixire coy mundeeteb xiiwonna sukkaare qargaranno. Duumu shunkurti biso hangaarsiissannonna giirtanno alarjiketinni gargaranno. Duumu shunkurta bura ita kolistiroole gargaratenni aleenni keeraancho wodanu gane heedhanno gede assanno. Duumu shunkurti giddo kiyurstiinete yinanni nixire coy kaansere gargaranno. Diishshichi iddanno woyte shiimu duumu shunkurti way buudhinummoro woyyimma afi`neemmo. Duumo shunkurta barru baala horoonsi`ra saltote madanni aga`rtanno. Haanju darchi birxichi duumu shunkurtunnihu vaaytaamine A amadinohura jawa horo noosi.
Dinnicha:- Saltote dhibbira hurre aanno. Mundeete xiiwono gargara dandiinanni. Kaanserete, muleho, umu damuumeranna wolootaho horo aanno. Ledoteno, dinnichu juuse kalaqamu dhibba gargarate dhuka lossatena woyyeessate kaa`lanno. Aganu mundeete daraaro dagganno woyte noo xisso hursate kaa`lanno. Keeru batiro`ne.
Jaanjiweelu Aanno Horo
Jaanjiweelu rumushshu sagale widira gaammanniho. Jaanjiweelo duucha yannara saga`la lowo horo uytanno. Korkaatunno giddosiinni noo nixire coy vaaytaamine Si, Maginizeeme hattono wolootta nixire fayyimmate lowo kaa`lo uytannota amadino daafiraati. Kuri giddo:-
Kaanserete dhibba gargaranno. Duucha yabba assinoonni xiinxallo la`niro jaanjiweelu kaanserete lopho uurrisanno nixire coy giddossi amadinohura xibbunni xibbe dhibba gargaranno. Tushshiishara looqi assanno woyte jaajiweelu shae angiro tushshiishanna looqi assa aguranno.
Saltotenna godowu looso busulsanno; woyyeessanno. Bisu usuramme gargaranno Jaanjiweelu sagalete daahamanna godowu keeranchimma seekke agaranno. Bisu eramme basenna niggate qarri hee`riro jaanjiweelu xagichoho. Jaanjiweelu shae aga aganna bisu usuramino baycho jaanjiweelunni riga lowo gede kaa`litanno.
Foollanni bisi qarra gargaranno. Ganshu ledo amadamino coye foollanniwa kokketenna gagasu aana ayyirraannore shotisanno hursanno. Mundeete doycho woyyeessanno. Jaanjiweelu shae giddo noo Vaaytaamine, Shiilo, Amino Asiide mundeete doycho woyyeessate luphiima horo noosi.
Meyaa beettora aganu daraaro dagganno yannara noo goduwu dhibba ajishanno. Meeyyaa beetto aganu daraaro yannara kalaqamanno godowu dhibba ajishate ibbitino jaanjiweelu shaennni fooxa shanshine godowa cuukkira dandiinanni. Giddosi noo nixire coyinni dhibba hursatenna gargarate wolqa noosi.
Yaaddo hunanno. Jaanjiweelu yaaddo hunate wolqa noosi yine akullanni. Tinino giddosinni noo kaajjado su`naanno foolisinna nixire coy korkaatinniit.
Wolu jaanjiweelu aanno horo buusanote dhibbira xagichoho. Baxxinohunni (asimete) yinanni buusanote dhibbira jaanjiweelu hurre aanno. Konnira aleenni shiqinshoommori gatu laalinna rumushshi sagalla dhiwamme calla ikkikkinni barru baala horoonsi`nanni tenne yanna giddo batidhanni hadhanno taraabbannotanna taraabbannoikki dhibba gargadhino. Keeru barra ikkonn`e.
Bakkalcho Dotteessa 20, 2014 M.D Hamuse 2
