Qiddist Gezaheny
Sukkaarete dhibbi batinye daga seeda dirrara qarrantanno fayyimmate qarrubba mereerinni mittoho. Sukkaarete dhibbi kalqoomu deerrinni qara shaanno dhibba ikkirono xaa geeshsha dhibba hursitanno xagga di anfoonni. ‘’Sukkaarete dhibba gargadhatenna ajishate callicho doogo dancha rosichonna taalo sagale saga’late amanyoote harunsate’’ yitanno fayyimmate ogeeyye.
Baxxinohunni Sukkaarete dhibbi hanafote aana nooha ikkiro danchu rosichinninna taalino saga’late amanyootinni mundeete giddo nooha sukkaarete bikka ajisha dandiinannita fayyimmate ogeeyye higge higge kayissanno. Ikkollana batinye daga mundeensa giddo nooha sikkaarete bikka ajishate dandiissanno doogo diaffino.
‘’Healthline.com’’ yinanni qooli fushshino mashalaqqe garinni; Manchi beetti mundeesi giddo nooha sukkaarete bikka ajishate dandiisannore shoole kalaqamu doogga shiqishino.
- Barru barrunkunni mannimmate guunte loosa Mannimmate guunte sukkaarete dhibba gargarate qara doogo ikkasenni shota gede la’’a dihasiissanno. Mannimmate guunte duucha woyte loonsanniha ikkiro hasiissannokkiha mannimmate giddo noo cooma gargarate dandiissanno. Konnira qoteho mannimmate seella Insuliinete noonsa dawaro woyyeessatenna mannimmate mikita millimmo assinanni yannara sukkaare horonsidhanno gede kaa’litanno.
- Qiwaate batidhino sagale ajisha Mundeete giddo noohu sukkaarete bikki alba noowiinni lexxanni noota huwantiro qiwaatete sagalla ajisha hasiissanno. Dandaami bikkini barru giddo saga’linannita qiwaatete sagalla ajishatenni Fayiberete amadonsa luphiima ikkitino sagalla horonsi’ra hasiissanno.
- Waa agatenni mannimmate shammete bikka agadha Mundeete giddo noohu sukkaarete bikki luphi yee moolle kalaqantanno gede assanno. Konninni harunsite mannimma giddonke noo waa co’o assite horonsi’ratenni hasiisannokki coye baalanka shumate widoonni fushshe hunate lowo geeshsha sharrantanno. Konni korkaatinni goo’ro dagganno; kuni ikkasira albaanni waa lowo geeshsha aga hasiissanno.
- Yaaddo agura
- Mannu heeshshotenni, loosunni, barru barrunkunni xaaddanno mitiimmanninna babbaxxino korkaatinni yaaddara dandiitanno. Yaada Manchi beetti kalaqamu amalesiiti. Ikkirono bikkunni sa’ino yaaddo fayyimmate aana qarra abbitanno. Sukkaarete dhibbira reqecci assitanno hajubba mereerinni mitte yaaddote. Yaaddo lowo geeshsha bikkunni sainota ikkituro mundeete giddo noo sukkaare lexxitara dandiitannota xiinxallotenni buunxoonni; konnira batissine yaaddinoonte!!
Bakkalcho Badheessa 22/ 2014
