Sai gashshooti;Ama dirijjite,kaa’laano dirijjitta yaatenni mito albisa mito duumbaayidiha assanni keeshshinoti ayerano di maaxamanno.
Sai 27 diri giddo bebbeehe gashshate injaasira ama dirijjite yaatenni shoole massagaanonna gumulsaano paarte calla Itophiyu kaayyo maltaare,faltaarenna gumulsitannore assatenni loosanni keeshshino. Hawaasa harinsi IHADEG 11 songo aana konni gedensaanni albisunna duumbayidi dirijjitta di heedhanno yine muro sayinsoonniti qaangannite.
Itophiyu baalunku gobbaati. Diinu daanno wote allagga shorrate hasiissanno mittimma gobba massagateno hattolla ikka hasiissanno.
IHADEG gerechu lande uddi’ratenni dimokiraasenna ayemmate xa’monni balba’le dubbunni quchumu mereero eatenno mootimmate deerra iillinohu Itophiya lawikkinni Itophiyu daga bade afikkinni 27 diro wo’ma Federaalete seerinni bukeessame lawisiisanni dimokiraasetenni feceleeqe gomichu gede amandannikki hexxonni seeda diro sufi. Ikkollana Dimokiraasete hoongi shigiggishshanno.
Keerunna latishshunnire,taalleenyunna wolaphonnire,farconnadimokiraasennire,meesssaneeti gashshootenna mittimmate gashshoote,taaltino horaameessimmare;wkl hajubba giddoyidinna gobbayidinni xaaddino soorro hasidhanno daganna massagaanonni jawa waaga baanteenna guma laaltino. Soorrono dagate wiinni adhamooshshe afidhu.
Dagano soorrote guma coommishidhara qalli yitinona soorrote massagaano jawaatte yite albaanni balaxisiissu.
Soorrote massagaanono sheemaatensa agarte soorrote guma dagate iillishshara looso hanaffu. Ikkollana soorro xabbinosikki HWHT kaajjado gamenni ilantino soorroduumba qolate goxano hooge wirrijjama hanafi.
Daga soorrote guma coommishidhannokki gede;soorrote massagaanono ga’labbi yite hedde loossannokki gede HWHT dandaannore baala assi. HWHT ilame lophino sharrete siiwo konneno ko’ono oli;sirchonna amma’no kaima assatenni laambunni kisiinsoonni haqqe balaxe qixxeessino kibiriitetenni amadisiissannorira sayise uyi. Insano dandiitannore baala kibiriitensa amadisiisate wo’naaltu.
Baca basera giira billicci assite xoyissa hanaffu. Jifotenni kaajjannohu,qarrunni jawaatannohu,dagate irkonni qaafannohu,eino qaalira ammaname loosannohu;soorrote massagaano kayinni kuri giira daga ittannokki gede assate dandaamisi baala assate wo’naali.;daga baqqi assatenni giiratenni xeerti’ranno gede assi. Kibiriite amadisiissuri amadisiissino giiranni qaccete heedhe giwaadhannore ikkitukkinni insa umonsa giirtenno gede ikki. Kunino dagate hexxo,soorrote wolqara jawaante,soorro duumbara qolate wo’naaltanno wolquwara kayinni hexxo mursiisannoha ikki.
Jireenyu soorro sinqisi’re,harinsho biifisatenni umosi wirri yee qorqore taashshatenni;haaruudde soorrote wolquwa beeqqisiisatenni soorrote woyyo loosunni buuxise poletiku qorichishamaano tiratenni;dimokiraase buuxisa hanafino.
Jireenyu sa’u lamala giddo umikki songo harisinoti qaangannite. Tenne umikki songonni;beeqqisiisa,dagate taalo horaameessimmara loosasi,loonsanni hayyo xambenna mooru saalfachishannoha ikkasihattono babbadamooshshe huna xawino garinni egensiise reqecci yino xawishsha uyinoho.
Konneno songote jeefora dimbe sa’nanni gumulonna ikkito dhagge ikkitinonna daga agadhitino gumulonna illacha xawino garinni paartennita aanino dinyi loossa wora’a assinoha ikke leellino. Kurinna wolootta soorrote widira xiibbino baca korkaattanna hedo soorrote layinki soodo afi’ra dandiinoonni.
Wolaphine tantanama,hedo xawisa,beeqqaancho ikkanna horaameessimma,miinjunna dagoomittete teelleenyi,poletiku qacce halashshanna halaalaancho dimokiraasenna Federaaliizime hajo dawaro qollanni nsa la’noommo jajjabba hajubbaati.
Songote kuriuu hajubba roore loosunni xabbe leeltanno gede afuunni calla ikkikkinni loosunni leella hasiissanno. Jireenyunniti umi songo bacare leellishshinote; roorimankanni mereerimu komite doorri harinsho addintanni xambe noota leellishshino. Jireenyu paarte mereerimu komite doortu gedensaanni 6 bixxille amadino uurrinshu xawishsha fushshite gumullanni gede jawa eeggonna hajajoo ledo mereerimu komite gumulsaanora uyitino.
Tini yawote; E’noonni woyyo loosu aana hosiisate yawo ragunni fula hasiissanno. 6 bixxille amadino uurrinshu xawishsha xaphi assine la’nummoro:- moora,mussinna,baincho assoote,loosu hoonge,heeshshote sutamanna dagate keeri booraambe wirro Itophiyu giddo ikkitannokki gede Jireenyu Paarte hashsha barra yitukkinni uurrite hossenna uurrite galte doortinonsa daga owaattara woyyo e’ino.
Bakkalcho Badheess 8, 2014 M.D
