Mittu manchi baaru aana callisi yowolotenni ha`ranna dambalu ka“i. Yowolono hiqqaqqante baaru giddora lixxu. Manchu meessaneetesi gatise mitte giddicho aana fooliishshi`ri. Shiima mine mi`ne barrubbate callisi hatte giddicho aana hee`ri. Qulxumme woshshaadatenni sagalimmate horonsi`rannino keeshshi.
Mitto barra qulxumme woshshaadara baaru widira maranni hee`reenna mereeroho hakko baari aana witiilete fooli su`naannosi. Badhi`lite la“anno woyte minisi tanqa yee giiramanni noonka. Bayichu geeshsha dodanni ha`ri; kayinni giira xooyissanna minesi gatisa didandiino. Qulxumme raisate kayisino giira amadisiisante minesi buluulo assitinohura manchu higaawi ba“eennasi wi`li. Maate`yawiinni baxxeemmo gede assite, callateemmo gedeno assite furmittoe gedensaanni daafure mi`noommo mine maayira giiritto yee magano abbooshshiri. Aaraawi; wi`li. Xiqqeessuwate gedensaanni mitte huuro macciishshi. Huurote widira alba qole la“anno woyte mitte jawa yowolo isiwa higge dagganna la“e; hagiidhi. Yowolote mannootino noowa dagge hogobbe haadhe hadhusi.
Hakkiinnino yowolote manna xa`mo xa`mi! hiitto affinie? Konne qooxeessa konne baarira ayino didaannowe; ki`ne hiitto affine daggini? Yiinsa. Mannotuno qoltannoti “Ninke widoonni hinge doyine ha`nanni hee`noommonkanni; hedeweelcho tenne wiliile la`ne mannu hee`rara dandaanno yineeti kawa dangoommohu; hakkiinnino ate anfummo” yitusi.
“Hoola magano! hada tenne shettonni fushshattoeranna qae`ya qolattoera hasidheeti mi`noommo mi`ne diigittohu” yii.
.Mite mite yannara anganke aana noo coy billaalle ba“anno. Konni korkaatinni maganono mannano aarsinanni he`neemmo; heeshsho`ya giddo kuni qarri maayira kalaqami yine hendanni surrenke akkimale daafursineemmo. Ba“inonkenna xe“inonke coyira badheenni wole dancha coyibba afi`nammora dandiineemmota deammeemmo. Hingeemmo e`neemmo battala ba`annonke. Kayinni qarrinke giddonni fulate illachanke ba`inonke coy aaninni kayisanna haaro coye kalaqa hasiissannonketa ay woyteno hawa dinonke. Dancha barra ikko`ne!!.
Abbebech Maatewoos
Bakkalcho Arfaasa 26, 2014 M.D Hamuse
