Dubbu mootichi Doobbiichu xiwaminota dubbu giddo heedhanno gaxigalla macciishshitino. Konni daafira gaxigalla ay woyteno dutanni qarrisannonsa woshichiwa maratenni “dubbu mootichi Doobbiichu xiwaminohura tini atera dancha hedeweelchootina, noo base marte shitesi biilloonyesi adhi” yitannosi.
Woshichuno gaxigalu amaale macciishshatenni Doobbiichunniwa mare Doobbiicho xona hanafi; sufeno kawa daawoommohu shaammoheraati; konni ka`a dubbu giddo mootimma dinohe; konni ka`a biilloonyu aneho” yiisi.
Tenne woshichunnita ikkito Doobbiichu ooso harunsitanni noohura “mooticha annanke! maayraati sammi yaattohu iso shaa hoogittoro ninke hajajinke ninke shineemmona” yitannosi.
Dubbu mootichi Doobbiichuno muushshi yee “ooso`ya! sammi yoommohu diwolqa hoogeeti diino dandaa hoogeeti, kaayinni mannootu Doobbiichu woshicho shiino yite hasaabbankenkunni woshichu Doobbiicho xonino yite hasaabburo woyyanno yeetiwe” yiinsa.
Bakkalcho Sadaasa 28/ 2014
