Addis Ababa:- Beyyene Pheexiroos (P/r) tenne kalqenni reyootenni baxxino. Konne lainohunni Itophiyu pireesete uurrinshara hedonsa uyitino miillasinna jaallasi “Pirofeeser Beyyene Pheexiroosi keerunna wolaphote sharramaanchooti” yaatenni xawissino.
Beyyene Pheexiroos (P/r) ‘’keeru sharro ejjeetichaati’’ yaanno Aregaawi Berihe (PhD). Konnirano kaiminsa wolootu gede gangalchantukkinni keeraancho doogonni soorro abba dandiineemmo yitannoti ha’nura ammana noosiha ikkasino naqqasanno. Kawaannino olunni dagganno soorro nookkita marro marro qole coyirannota xawisanno.
Ithophiyu giddo jawa yannara poletiku millimillo assitanni keeshshituri macca mannooti giddo Beyyene Pheexiroos (P/r) mitto ikkasi coyi’rinohu Aregaawi Berihe(PhD); 1983 MD kayisse noo sharrora ledonsa loosanni sharramanni keeshshinota qaaganno.
‘’Baxxinohunni ninke saajjuu diro meddisanno yannara xoonqe hee’neenna Beyyene Pheexiroos (P/r) Itophiyu giddo hee’re keeru sharro harisanni noonka. Konninnino gobbaanni hee’ne assineemmo sharro suwisate looso loosino’’ yaanni Aregaawi Berihe(PhD); wolootu poletiku paarte miilla ledo noosi xaadooshshi keeraancho sharro ejjeettimmasinni ledo sumuumme afi’rinoha ikkinota qummi assanno.
Itophiya soorro abbitara dandiitanno yee ammananno hedo adhate wole balaxote qixxaawo hasiissannokkisita kulanni Aregaawi (PhD); rosiisaanchimmanna poletikaanchimma kibbantannonsakkita kulanno. Keeraancho sharro harunsitanno poletiku paarte ledono danchu xaadooshshi noosita kayisanno.
Wole widoonni kayinni, ola hasidhannori ledo kayinni keeraancho sharro leellishanno xaadoshshi noosita kulanni Aregawi Berihe(PhD); sasu tonni dirrara saino halallu poletiki millimillosi duucha qarrubba gaancunninna urdetenni tira rosicho ikkite keeshshitinose gobbankera, Itophiyaho, baalanka wolaphaancho assannohu urde goshooshi’ra ikkitukkinni hedo soorri’rate xawo/ doogo kalaqi’ra woyyitannota ikkase loosunni maareekkisiisinoha ikkasi qummi assanno.
Poletiku paarte mittimmate amaale mini albisaanchi kalaa Desta Diinqa umisi widoonni; Beyyene Pheexiroos (P/r) olu roore dagara goofo ikkinnina keere abbitanna dila’noommo yitanno hedo noonsa poletikenya ikkasi xawisanno. Olunni tiramanno qarri dino yitanno hedono noosinkanni. Konni daafira tenne hedo poletikenyootu raabbe harunsinanni gede assa hasiissannonsata huwachishanno.
Beyyene Pheexiroos (P/r) rosiisaanchimmanna poletikenyimma dikibbantinonsa. Rosu mine leellanno wote dancha rosiisaanchonna xiinxallaancho, poletiku barerano hedote yekkeeramaanchooti. Poletikuno ikko rosiisaanchimma karsantukkinni bare barensanni biifise fulanno. Konne loosono harunsanno gede assa hasiissannota coyi’ranno.
Itophiyaho jawa yannara keeraancho poletiku millimlillo assatenni afaminohu Beyene Pheexiroos (P/r); Addis Ababu Yuniversiterano rosiisaanchimmatenni hattono Fooqa 4,2012 MDni Poolisete Xiinxallo Instituute qara dayirektere ikke xaphoomu ministirchinni mootoo’me loosanni keeshshasi qaangannite. Galtinosi xisso korkaatinni jawa yannara hakimete kaa’lonni keeshshihu gedensoonni tenne alamenni rewootenni baxxino.
Pirofeeser Beyyene Pheexiroos reyo harunse xaphoomu ministirchi Abiy Ahmed(PhD) macciishshaminosi dadille xawisino. Xaphoomu ministirchi dagoomite qoolisira sayisino dadillu xawishshi garinni; “Pirofeeser Beyyene Pheexiroosi seeda yannara hakimete kaa’lonni irkisame keeshshihu gedensoonni tenne kalqenni reyotenni baxxasi macciishshummo wote wodaninni dadiloommo” yiino.
“Itophiyaho kaajja poletiku bude kalaqate jawa qeecha fulatenni keeru sharro malaate” yaatennino xawisino. Xaphoomu ministirchi Abiy Ahimed(PhD) Pirofeeser Beyyene Pheexiroos keeshshishino iqqinna doni ha’nure keeshshanno gede lubbosino keerunni fooliishshidhanno gede halchino.
Pirofeeser Beyene Pheexiroos madaarshi amanyootino techo barra fiixu firisi, baxillaanosi, babbaxxitinori luphiima mootimmate gashshaanonna sooreeyye; hattono, Itophiyu daga noowa gumulamino.
Demmellaash Demmeqe
Bakkalcho Wocawaaro 9, 2017 M.D
