Addis Ababa:- Xaphooma gobboomu amaalamme songo amandoonni 2017 M.D goofimarchira harinsannita gobboomu amaalamme komishiine egensiissu. Tigirayenna Amaaru qoqqowubba ledikkinni baalante qoqqowubbaranna lamunku quchumu gashshoottara hasaawu hedo gamba assate harinsho birru agani 2017 M.D goofimarchinni jeeffanno.
Itophiyu gobboomu amaalamme komishiinerchi piroofeeser Mesfin Ariaaya Itophiyu pireesete uurrinsha ledo assino keeshshonni; sa`u lame dironna ontu aganira qoqqowubbanna woradda garunni badate loossa gumulantinota buuxise; haaru diri kaima ikkitinonna sumuu yaa dandiitinokki korkaatta bande fushshatenni gutu hasaawa assinanniha ikkasi egensiisino. Konnirano 2017 M.D komishiinete qara yanna ikkitinota coyi’rino.
Komishiine birru agani 2017 M.D goofimarchi geeshsha Federaalenniha lede 10 qoqqowubbanna lame quchumu gashshoottara hasaawu hedo gamba assate harinsho jeefissannotano xawisino.
Badate loosinni hajo la’annonsa bissa ledo ikkatenni daga hasaawu hedo gamba assite uytanno harinsho injeessatenni hala’lado loossa loosantinota komishiinerchu xawise; xaa yannarano mitto kume ale ikkitanno woraddanni hasaawu sirnyuwa gamba assinanni afammanni yiino.
Gamba assinoonniti hasaawu hedubba qoqqowunna Federaalete hajo la’annonsa bissa ledo ikkatenni 2017 M.D goofimarchi aana qara gobboomu amaalamme songo harinsanni yaatenni; tenne harinsho giddo muli yannara gobboomu amaalamme songora beeqqaano badatenni Benishaangul Gumuzete, Sidaamu, mereerimi Itophoyi, Hararetenna wolootta qoqqowubbanna quchumu gashshoottara hasaawu hedo gamba assate looso gumulloonnita buuxisino. Aantanno barrubbanni hanafe Affaaretenna Sumaalete qoqqowubbara labbino loossa loonsannitano egensiisino.
Birru agani goofimarchi geeshsha Federaalenniha lede 10 qoqqowubbanna lame quchumu gashshoottara hasaawu hedo gamba assate harinsho jeeffannono yiino.
Tigirayetenna Amaaru qoqqowubbara noo akatubba injiitanni hadhuro aantete tenne qooxeessubbarano labbino loossa gumulantannota komishiinerchu coyi’rino. Kuri loossa gumulanturo 2017 M.D goofimarchira Itophiyu gobboomu amaalamme songo harinsanni yee xawisino. Kunino komishiinete uyinoonni loosu yanna giddo gumulamannoha ikkasi buuxisino. Amaalammete songo gedensaanni loosantanno loossano daganna mootimma murtannoha ikkanno yeeno xawisino.
Komishiinerchu; “Diru Itophiyu dagara keerunniha, fayyimmanniha, duuchunku aleenni sa’ino qarrubbanke huwante gaabbine, mimmitinke ledo araaramme gobboomu lopho widira qaanfeemmo yannanna sane ikkannonke gede halcheemmo” yaatennino haaru dirita dancha halcho xawissannota sokkasi baalante Itophiyu dagara sayisino.
Abbebech Maatewoos
Bakkalcho Wocawaaro 9, 2017 M.D
