Addis Ababa:- Xaphoomu ministirchi Abiy Ahimed (D/r) Biilinna Melinda Geetisi fawundeeshiine Itophiyaho assitanno irkora galata shiqishino.
Xaphoomu ministirchi dagitte xaadi qoolisi aana sayisino sokkanni Biil Geetis 2010 M.D gedensaanni layinki marro hawalle Itophiya dayitto yiino. Biilinna Melinda Geetisi fawundeeshiine gibirinnunni, fayyimmatenna fayinaansete handaarinni beeqqisaancho assate assinanni wo`naalshubbanni assitannonke mommoddinokki irkora lowo geeshsha galateemmo yee xawisino.
Xaphoomu ministirchi Abiy Ahimed (D/r) techooti qamadete kilaastere latishshinna lukkuwu ce“atto aana illachishshino towaanyo Itophiyu sagaletenni meessaneeto dandaate wo`naalshinni doogose kaajjishshe noo yannara kaajjitinota halammenke roorenkanni kaajjishshannote yiino.
Oromiyu dagoomu qoqqowi mootimma pirezidaantichi Shimellis Abdissihu ledo ikkatenni Itophiyunniha sagaletenni meessaneeto dandaate wonaalshira qara gafa leellishshannota kilaasteretenni lattino qamade soojjaatu Shawa zoonera Dugida woradira hattono Adaamu investimentete gaamo lukkuwu ce`o mereersha towaattino.
Umihu Biil Geetis towaanyo illachi gibirinna, fayyimma, fayinaansete beeqqisaanchimma labbinore Itophiyunnita qara sekiterubbanna hala`lado dagittete dijitaalete safote latishshi ajandi lopho kaajjinshe la“atenni xaphooma huwanyo cu`mirate.
2010 diri gedensaanni fawundeeshiine sufote lophoranna sagalete wowera kaa`litanno investimente Itophiyaho gibirinnu looso irkisatenni harissinota xaphoomu ministirchi borro mininni afi`noonni mashalaqqe leellishshanno.
Abbebech Maatewoos
Bakkalcho Woxawaajje 30, 2016 M.D
