Wodiidi Sidaamu zoonera addi addi dagoomitte hajubba aana jirsa tunge loosatenni danchu gumi maareekkamanni noota zoonete dagoomittete hajubba biddishshi sooreette dukko Hayyaalneshi Hanqamoti xawissu.
Dukko hayyaalneshi dagoomittete hajubba mereerinni hawadi dancha fajjo loosi qarunni kullanniho yite; tayxe hawadi wedellu dancha fajjo loosinni 180 kume 316 wedella beeqqisiisatenni 13 loosu daninni owaante uyinanni hee’noonnita qummeessitino. Wodiidi
Sooreette Itophiyu pireesete uurrinshani ledo keeshsho assitu yannara xawissino garinni,buxanete mine minanna haaroonsa, dhuka ajjino maatera uduunnu irko assanna mundee aatenni dagooma owaattanni afantanno.
Konni garinni xaphooma zoonete tayxe wedellu hawadi dancha fajjo loosinni 165 Miliyoone 23 kume 733 birra mootimmate fulo gatisate mixo amande loonsanni hee’noonnita buuxissino.
Woluno fayyimmate widoonni zoonennihu diilallote akati karso ikkasi kayissannoti dukko Hayyaalneshi, baxxinohunni tini hawadi yanna ikkasenni shekkeeretenna xeenu ledo amadaminohunni waayinni daanno dhibba gargarate umihunni dagoomaho huwanyoote kalaqate looso kaajjinshe loonsoonni yite; biinne gargarate Agobere tuqinse horonsi’rate aananna waayi ga’rannokki gede assate dagoomaho roso uyinoonnita kultino.
Hattono daga dagoomu fayyimmate wowe horonsi’raano ikkitanno gede assinoonniha ikkanna; tayxe baxxino garinni bikkamino garinni ikkikkinni daga dhukinsa bikkinni diru baatooshshe baattanno gede assinoonni. Konninnino zoonete 84 kumi minu wiliilchi fayyimmate wowe miila ikkanno gede mixi’ne mixo wo’munni wo’ma jeefinsoonnita huwachishshino.
Mite mite yannara xagichu hoongi ledo amadame ka”anno koffeenyira sooreette dawartanni; mite yannara hasi’noonni xagga gooffinoha woyi nookkiha ikkiro xissamaanchu hasi’ranno xagicho gobbanni hidhanno gede assinannita kulte, aantino yannara xagichu anje heedhannokki gede xagga hirate loosino mitto illacha tunganniho yitinno.
Aanino diro konni handaarinni uyinanni owaante woyyeessatenna Ambuulaanse haaroonsate baxxitino hayyo kalanqe loonsannitano xawissino. Roorenkanni amuwu fayyimmate uurrinshara ilanno gede huwanyo kalaqate, islancho fayyimmate owaante aate islancho uurrinsha hasiissanno; islancho uurrinsha hee’rate keeraanchu ollii hee’ra hasiissanno. Konnirano zoonete giddo 5 qaddo woradda bandoonnita buuxissino.
Jeefoteno sooreette sokkasenni; hee’noommo yanna xeenunnita ikkasenni daga jawa qoropho assa hasiissanno; baxxinohunni qaaqquulle callansa agura hoongiro danchaho . Hattono rosu mini injiinoha ikkanno gede daga annimmatenni kaa’lo assitara woshshatto assitanno.
Wedelluno aanino diro qaaqquullu rosu mine e’’a hasiissannansa qa”ete gattannokki gede konni hawadinni rosu uduunne gamba assate looso kaajjishshe loossanno gede sokkase sayissino.
Qiddist Gezzaheny
Bakkalcho Woxawaajje 23, 2016 M.D
