Sidaamu qoqqowi industirete biiro 2016 baajeettete diri loosu jeefishshinni Itophiyu deerrinni layinkita ikkite jeefissinota kulloonni. Industirete ministere 2016 M.D handaaru loosu jeefishshi keeno Hawaasi quchumira harissanni keeshshitinoha ikkanna qoqqowubbate ripoorte shiqqeenna hasaawa assinoonni.
Industirete ministere ministirchi kalaa Melaaku Aallebeli; Industirete handaari gobbate miinji luphi yiino deerrinni kaa’lanni noota xawise; qoqqowubba aanino baajeettete dirira baxxino illacha tugge loossanno gede huwachishe, gobbate gede hananfoonniri handaaru inisheetiivubba kaajjite suffannota buuxisino.
Tayxe baajeettete dirinni borreessantino qeelle aanino baajeettete dirinni kaajjite suffanno gedenna leellinohu laafu midaadi baxxino illachinni taalanno gede huwachishinno.
Barete aana baajeettete dirinni luphiima guma borreessiissino qoqqowubbara afanshanna baraarsha uyinoonninsaha ikkanna Sidaamu qoqqowi industirete biiro Diredaawu quchumi gashshootinni aante diro layinki deerrinni jeefissino. Oromiyu qoqqowi sayikki deerrinni jeefisino. Sidaamu qoqqowi industirete biiro layinki deerra amadde jeefisasenni uduunnunna woxu baraarsha afidhinota qoqqowu xaadooshshu biiro fushshitino mashalaqqe kultanno.
Gaazeexu Odeessaanchinni
Bakkalcho Woxawaajje 23, 2016 M.D
