Addis Ababa:– Saadate sircho woyyeessatenni handaaru laalchimma lossatenna qansootu heeshsho woyyeessate illachinshe loonsanni hee’noonnita Pirezidaantichu Desta Ledamo coyi’ri.
Sidaamu qoqqowi pirezidaantichi kalaa Dasta Ledamo Wodiidi Sidaami zoone Alatta Wondi woradira saadate latishshi towanyonna 2017 baajeettete diri saadate sirchi woyyaambenna sagale latishshi hanafote bare faajjetenni hanafisiissino.
Aliyye Sidaami zoonera Saadate latishshi loossa towanyo hanafinohu pirezidaantichu; berono Alatta Wondi woradira handaarinni base baalantera nooha dhaggeeffachishanno latishsha towaatino.
Pirezidaantichu towanyotenni ledote qoqqowu 2017 baajeettete diri saadate sirchi woyyaambenna saadate sagale latishshi hanafo qixxaawo woradaho Gidiwo olliira hanafisiisino.
Towanyonnihu qaru illachi qoqqowu mootimma maatete jireenyi loossa amaddino mixo gummaame assatenna gumulantino loossa dargaho leelle la”atenni handaaraho bobbakkinore jawaachishatenna irkisate ikkinota xawinsoonni.
Saadate jiro latishshi gummaa’ma lossatenna qansootu heeshsho soorrantanno gede assate woyyaawino saadate sircho batisa, saadate sagale shiqishonna halashsho hattono woloota hasiisanno uduunne wonshate mootimma illacha tugge loossanni afantannota pirezidaantichu xawisino.
Deerra deerranko afantannori mootimmate loosu sooreeyye konne looso qooxeessinsara kaajjishshe sufisiissanno gede huwachishino.
Mootimma konne handaara albillitteno kaajjishshe suffannota kayisatenni dagoomu roorenkanni bobbahanno gedenna halashshanno gede pirezidaantichu woshshatto assino.
Towanyote Sidaamu qoqqowi amaale mini Songaafitte dukko Faantaye Kebbede, Jireenyu paarte qoqqowu sinu borro mini sooreessi kalaa Abrahaam mashallohu, qoqqowunniri jajjabbu loosu sooreeyye lede zoonetenna woradu gashshaano hattono gobbate geerri afantinota Pirezidaantichu borro mininni afi’noommo mashalaqqe leellishshanno.
Qiddist Gezzaheny
Bakkalcho Woxawaajje 23, 2016 M.D
