ትውልድና ዕድገት
የአቶ ለገሰ ዘሪሁን እና የወይዘሮ ሙሉሸዋ ክንፈ የአብራክ ክፋይ የሆኑት አቶ ነብየልዑል ተወልደው ያደጉት በመዲናችን አዲስ አበባ ነው። አቶ ነብየልዑል የሚታወቁት በአባታቸው ስም በመጠራት ቢሆንም አልፎ አልፎም በአባታቸው ስም መጠሪያ ቦታ የእናታቸውን ስም ተክተው እንደሚጠሩ ይናገራሉ። በእናታቸው ስም መጠራታቸው ደግሞ ያስደስታቸዋል፤ ይሄ ቀጣይ መሆን አለበትም ይላሉ። ለምን ይሆን? አቶ ነብየልዑል ይህን አሉን፤
አባታችን ልጆች ከተወልዱበት ጊዜ ጀምሮ በአባታቸው ስም ነው ከስማቸው ጋር ይዘው ነው የሚኖሩት የእናታቸውስ የሚል ጥያቄ እያነሳ፤እናት ትልቅ ቦታ እንዳላት እየነገረና እያስተማረ ነው ያሳደገን። እናትነት እውነት አባትነት ደግሞ እምነት ነው የሚል አባባልም አለ። ስለዚህ በልጆች እና በአባታቸው ስም መካከል የእናት ስም መግባት ኖሮበት ስማችን የሁለቱንም ወላጆች መጠሪያ የያዘ እንዲሆን ሃሳብ ያቀርባል። እኔም ይህንን ሃሳብ እደግፈዋለሁ፤ አምንበታለሁ። ስለዚህ አንዳንድ ቦታ ላይ ነብየልዑል ሙሉሸዋ ለገሰ ተብዬ እጠራለሁ። ይሄ ግን ሁልጊዜም አይደለም። ምክንያቱም በእኛ ሀገር የተለመደው ስም ከነአባት ወይም ከነአያት በመሆኑ አብዛኛውን ቦታ ስሜ የሚታወቀው በተለመደው መልኩ ነው። ይሄ ግን ወደፊት በሁሉም ቦታ ላይ መለመዱ አይቀርም የሚል እምነት አለኝ ይላሉ።
በ1971 ዓ.ም ይህችን ዓለም የተቀላቀሉት አቶ ነብየልዑል ዕድገታቸውም በአዲስ አበባ ቦሌ አካባቢ መሆኑን አጫውተውናል። ለመጀመሪያ ጊዜ የትምህርት ገበታን የጨበጡትና ትምህርት የተቋደሱት በቅዱስ ዮሴፍ ትምህርት ቤት ነው። የመጀመሪያና ሁለተኛ ደረጃ ትምህርታቸውንም በእዚያው አጠናቅቀው ባገኙት የሁለተኛ ደረጃ መልቀቂያ ፈተና ውጤት መሰረት አዲስ አበባ ዩኒቨርሲቲ ገብተው የመጀመሪያ ዲግሪያቸውን በፖለቲካል ሳይንስና ዓለምአቀፍ ግንኙነት አግኝተዋል። ቀጥለውም ወደ አሜሪካን ሀገር በማቅናት በሲያር ዩኒቨርሲቲ እአአ 2005 ሁለተኛ ዲግሪያቸውን በማርኬቲንግ አድሜንስትሬሽን ሠርተዋል።
አቶ ነብየልዑል የመጀመሪያ ዲግሬያቸውን በፖለቲካል ሳይንስና ዓለምአቀፍ ግንኙነት ካገኙ በኋላ እንደ ጓደኞቻቸው በተማሩበት ሙያ ተቀጥረው ለመሥራት ሃሳቡ ነበራቸው። አብረዋቸው የተማሩ ጓደኞቻቸው በውጭ ጉዳይ ሚኒስቴር፣ በተለያዩ ኤምባሲዎች ተቀጥረዋል፤ሌሎች ደግሞ በተለያየ ሙያ ላይ ተሰማርተውም ዓይተዋል። ሰዎች በተማሩት ሙያ ብቻም ሳይሆን በተለያየ መስክ ላይ ተሰማርተው ማየታቸው እሳቸውም የራሳቸውን ምርጫ እንዲወስኑ ዕድል ከፍቶላቸዋል።“ እኔም ከተማርኩት ሙያ ውጭ መሰማራት እችላለሁ የሚለውን በውስጤ አሳደርኩ። ”በማለት ነው ከተቀጣሪነት ወደ ሥራ ፈጣሪነት የዞሩበትን አጋጣሚ ያስታወሱት።
አቶ ነብየልዑል የአንድ ሙያ ባለቤት ብቻ አይደሉም። አሁን ከተሰማሩበት የሥራ ዘርፍ ውጪም ሙዚቀኛ ሆነው ታዋቂ ከሚባሉ አርቲስቶች ጋርም ተሰልፈዋል። በዚህም ውስጣዊ ስሜትን ከማርካት እስከ ገንዘብ ማግኛነት ተጠቅመውበታል። “እኔ ባለ ብዙ ሙያ ባለቤት ነኝ፤ ቀደም ሲልም ሙዚቀኛ ሆኜ ሰርቻለሁ። የመጀመሪያ ዲግሪዬን እንደያዝኩም ያዘነበልኩት ወደ ሙዚቃው ነበር። ሙዚቃውን ለመጫወት እየተዘዋወሩኩም ጎን ለጎን ደግሞ ሁለተኛ ዲግሬዬን የምሠራበትን ሁኔታ ለማመቻቸት የተለያዩ መንገዶችንም አማትር ነበር። በተለያዩ የውጭ ዩኒቨርሲቲዎች ማመልከቻ በማስገባት እከታተል ነበር›› ይላሉ። ይሄ ሃሳባቸው ተሳክቶላቸውም ወደ ሀገረ አሜሪካ አቀኑ። የአቶ ነብየልዑል ከአገር የመውጣቱ ጉዳይ ተጨማሪ ትምህርት ለመማር እንጂ ከሀገራቸው እንዲሰደዱ አላደረጋቸውም፤ይልቁንም ትምህርታቸውን አጠናቀው ወደ እናት አገራቸው በመምጣት ራሳቸውንና ህብረተሰቡን በሚጠቅሙ ሥራዎች ላይ ተሰማሩ ።
ከአሜሪካ መልስ
ወደ ሀገር ቤት ከመጣሁ በኋላ በአገራችን ላይ ምን ምን ችግሮች አሉ የሚለውን ለመለየት ጥናት አደርግ ነበር፤በዚህ መሀል በተለይ ደግሞ የራሴን ቤት ሳድስ ያጋጠመኝ የአንዳንድ ቁሳቁስ (ማቴሪያል) እንደ ቁምሳጥን፣ ኪችን ካቢኔት፣ በሮች… ችግር ፊቴን ወደ እንጨት ሥራ ሙያ እንድመልስ ጥሩ አጋጣሚ ፈጠረልኝ። እስኪ የተቸገርኩትን የእንጨት ውጤቶች ለመሥራት በቅድሚያ የሚያስፈልገኝን ለራሴ በመሥራት ልጀምር ብዬም አነስተኛ ማሽን ገዝቼ አብረውኝ የሚሠሩ ወጣቶችንም አስተባብሬ ለሙከራ ተነሳሁ። ያሰብኩትን መሥራት ቻልኩ፤ ከዚያም ይሄን ሥራ ብሠራ ውጤታማ ለመሆን እንደምችል እርግጠኛ በመሆን ለሌሎችም ለማውቃቸው ሰዎች በተመሳሳይ መሥራቱን ቀጠልኩ። ከዚህ ተነስቼ ቀስ በቀስ በማስፋፋት አሁን ለደረስኩበት ደረጃ በቃሁ።
የሙዚቃ ዝንባሌ
ሙዚቃን መለማመድ የጀመርኩት በስምንት ዓመቴ ነው። የሙዚቃ ፍላጎትና ፍቅር እንዲያድርብኝ ያደረገችኝ ደግሞ እናቴ ናት። ወደ ሙዚቃ እንድሳብ ውጤታማም እንድሆን ያደረገችኝ እናቴ በልጅነቴ ለሁላችንም ልጆች ፒያኖ ገዝታ ኮሪያዊት የሙዚቃ አሰልጣኝ ተቀጥራ ፒያኖ መጫወት እንለማመድ ነበር። አስተማሪያችን አስተምራን ስትሄድ ደግሞ የተማርነውን ነገር ለአባታችን እናስተምር ነበር። በደንብ አድርጎ ያስተማረ ልጅ አንድ ብር ይከፈለዋል። ያችን አንድ ብር ለማግኘት በሚል በደንብ አድርገን እንማራለን፤በደንብ አድርገንም እናስተምራለን። ስለዚህ ፒያኖን እህቶቼና ወንድሜ እንዲሁም በመጠኑም ቢሆን አባታችንም ይጫወታል።
ከዚህም በተጨማሪ የመጀመሪያና ሁለተኛ ደረጃ ትምህርቴን በምማርበት ወቅት በፍላጎት የሙዚቃ ክፍለጊዜ ይሰጠን ነበር። ሙሉ ለሙሉ ወደ ሙዚቃው የገባሁት ግን በ1988 ዓ.ም የሁለተኛ ደረጃ ትምህርቴን እንዳጠናቀቅኩ ነው። በወቅቱ አክሱማይት ባንድ የሚባል ነበር፡፡ ከእነሱ ጋር በሂልተን ሆቴል እንጫወታለን። እዚያ እየተጫወትኩ ባለሁበት ወቅት ነው በ1989 ወደ አዲስ አበባ ዩኒቨርሲቲ የገባሁት። የመጀመሪያ ዲግሪዬን እንደጨረስኩ ደግሞ በ1992 ዓ.ም ጓደኞቼ ባቋቋሙት አፍሮ ሳውንድ ባንድን ተቀላቀልኩ። ባንዱ እነሸዋንዳኝ፣ቴዲ አፍሮ፣ግሩም መዝሙር እና ሌሎችም ታዋቂ የሙዚቃ ባለሙያዎች የነበሩበት ነው። በዚህም ትልልቅ ቦታዎች ላይ የመውጣት ዕድሉ አጋጥሞኛል። በዚህ መልኩ ሙዚቃና ሙዚቀኞች ጎራ ጎራ ለማለት ችለዋል።
አስተዳደግ
በቤታችን ተሞላቆ ያደገ ልጅ የለም። ሁሉም ነገር ተሠርቶ ተደክሞ ነው የሚገኘው፤ የሚሠራ ሰው ደግሞ እንደሚከፈለው ገንዘብም ማግኘት እንዳለበት ነው የሚነገረን፤በተግባርም የሚታየው ይሄው ነው። ለምሳሌ ተማሪ በነበርን ወቅት በተለይ በክረምት ትምህርት ቤት ሲዘጋ በቤተሰባችን የቤንዚን ማደያ ውስጥ እኔም ወንድምና እህቶቼም መኪና የማጠብ ሥራ ተቀጥረን እንሠራ ነበር። ይሄንን ሥራ የምንሠራው ገንዘብ ተከፍሎን ነው፤ገንዘብ ሲከፈለን ደግሞ ለቤተሰቦቻችን ከደመወዛችን ላይ የቤት ኪራይና የምግብ መክፈል አለባችሁ ስለምንባል እንከፍላለን።
በእዚያ ወቅት ግን ለምን ያስከፍሉናል የሚል ቅሬታ ያድርባቸው እንደነበርም ያስታውሳሉ አቶ ነብየልዑል። ምክንያቱም እኛ ገንዘቡን ማጠራቀም እንፈልጋለን እንዲቀነስብንም አንፈልግም። ሆኖም ግን የቤቱ ህግ ነው አንድ ሰው በትርፍ ጊዜው መሥራት የሚገባውን ሥራ በአቅሙ መሥራት አለበት፤ገንዘብ የሚያገኝ ሰው ደግሞ ወጪም ማውጣት አለበት የሚል ነው። ይሄን ወደ ሀገር ብንወስደውም ተመሳሳይ ነው ገቢ የሚያገኝ ማንኛውም አካል ከገቢው ላይ ታክስ መክፈል አለበት እንደማለት ነው።
ይሄ የቤተሰባችን መርህ አንድ ትልቅ ነገር አስተምሮኛል ይላሉ እንግዳችን። ምንም ነገር ለማግኘት መሥራት እንደሚገባ ሲሠሪ ገንዘብ ይገኛል፤ ገንዘብ ያገኘ ደግሞ ግዴታው የሆኑትን ነገሮቸ መወጣት አለበት የሚል። ይሄ ለእኔ ትልቅ ትምህርት ሰጥቶኛል። በወቅቱ ግን ለጓደኞቻችን በክረምት ሠርተን ካገኘነው ገቢ ለቤት ኪራይ ለምግብ እንከፍላለን ስንላቸው ምን ዓይነት ወላጆች ቢሆኑ ነው ይህንን የሚያደርጉት ይሉን ነበር። በወቅቱ ወላጆቻችን ገንዘቡን የሚያስከፍሉን ገንዘብ ስላልነበራቸው ወይም እኛን ለመጉዳት ብለው አይደለም፡፡ ገቢን ብቻም ሳይሆን አስፈላጊ ወጪዎችም እንዳሉ እንድንገነዘብ፣ የገንዘብን ጥቅም እንድናውቅም ጭምር ነው። ይሄ ደግሞ አሁን ለደረስንበት ደረጃ ትልቅ እገዛ አድርጎልኛል። አጠንክሮኛል። ልጅ በቤተሰቡ ተጧሪ መሆን የለበትም ብዬ አምናለሁ። ለምሳሌ በአሁኑ ወቅት ድርጅቴ ያለበትን ቤት የተከራየሁት ከቤተሰቦቼ ነው። የወላጆቼ ቤት ስለሆነ በነፃ አልገለገልም፡፡ እንደማንኛውም ደንበኛ በህግና በስርዓት እጠቀማለሁ ግታዬን እወጣለሁ፤ መብቴም በተመሳሳይ ይከበራል።
የእኔ ግብ
አባቴ ደጋግሞ የሚለው አንድ አባባል አለው። “ የአንድ አስር አለቃ ልጅ ቢያንስ ቢያንስ አባቱ እደረሰበት አስር አለቃ ደረጃ ላይ መድረስ አለበት፤ከተሳካላት ደግሞ መቶ አለቃ ወይም ሻምበል መሆን አለበት። ያኔነው ስኬታማ ሆኗል የሚባለው”ይላል። ከዚህ በመነሳት እኔም ብችል አባቴ የደረሰበት ደረጃ ለመድረስ አስባለሁ፤እዚያ ደረጃ ለመድረስም እሠራለሁ። ለእኔ አባቴ የደረሰበት ደረጃ ከፍ ያለ ስለሆነ እዚያ ደረጃ እደርሳለሁ? ብዬ ራሴን ስጠይቅ እግዚአብሄር ይርዳኝ ብዬም ለራሴ እመልሳለሁ። ከደረስኩ ግን እግዚአብሄርን አመሰግናለሁ።
አባቴን ለእዚህ ደረጃ ያበቃው ብዬ የማስበው ታማኝነቱ ነው። ከልጅነታችን ጀምሮም ሲያስተምረን የኖረው ታማኝ መሆን ነው፣ ትክክለኛ የሆነ ሥራ የሚሠራ ሰው ደግሞ ያገኛል እንጂ አያጣም። በቃል መገኘት፣ ታታሪነት ደግሞ የበለጠ ውጤታማ ያደርጋል። እኔም በዚህ አምናለሁ።
ምን ላይ ደረሱ?
ዋሪት የእንጨት ሥራዎች ድርጅትን ከአስር ዓመት በፊት ስከፍት የነበሩኝ አራት ሠራተኞች ብቻ ናቸው። አሁን ድርጅቱ አድጎ ከ200 በላይ ሠራተኞችን የሥራ ዕድል ተጠቃሚ ማድረግ ችሏል። ሥራዎቻችንም ተወዳዳሪና ተመራጭ በመሆናቸው ለተለያዩ ኤምባሲዎች፣ ባንኮች፣ ሪልስቴቶች፣ የግል መኖሪያ እና ሕንፃዎች ምርቶቻችንን በማቅረብ ለአገራችን የኮንስትራክሽን ዘርፍ ዕድገት የበኩላችንን አስተዋፅኦ በማድረግ ላይ እንገኛለን ሲሉ ነው የተናገሩት።
ከ90 በመቶ በላይ የሚሆኑት የድርጅቱ ሠራተኞች ስለ ሥራው ዕውቀት ኖሯቸው የተቀጠሩ ሳይሆኑ ድርጅቱ ውስጥ በረዳትነት ገብተው ከታች ጀምረው እስከ ኃላፊነት ደረጃ የደረሱ ናቸው። አብዛኛዎቹ ሠራተኞች ከሥራው ጋር ተመሳሳይ የሆነ ትምህርት እንዲማሩ አድርገናል። ከሥራው ጋር ተቀራራቢ የሆኑ ትምህርት የሚማሩ ከሆነ የትምህርት ወጪያቸውን የምንሸፍንበት ሁኔታ አለ። አሁን ሠራተኞቼ ከማስተርስ ጀምሮ እስከ አነስተኛው የትምህርት ደረጃ ያላቸው ናቸው። ከእንጨት ሥራ ጋር ተያይዞ በተለይ ከሥራው ጋር ቀጥተኛ ግንኙነት ላላው ሥራ ለሚማሩትም የትምህርት ቤት ወጪያቸውን በአብዛኛው የምንሸፍንበት ጊዜ አለ።
የስኬቱ ምስጢር
ማንኛውንም ነገር በደስተኛነት፣ ፍላጎት ኖሮ መሥራት ከተቻለ ስኬታማ መሆን ይቻላል ብዬ አስባለሁ። ከምንም በላይ ደስተኛ ሆኖ፣በታማኝነት መሥራት ውጤታማ ያደርጋል። በዚህ መልኩ ሰዎች ሥራቸውን ከሠሩ ውጤታማ ይሆናሉ። እኔም በሁሉም መስክ ውጤታማ ለመሆን የምችለው የምሠራውን ነገር በፍላጎት፣በታማኝነት እና በታታሪነት ስለምሠራ ነው ብዬ አስባለሁ።
ወጣቱ ምን ይማር?
አንድ ሰው በተማረበትና በሰለጠነበት ሙያ ላይ ቢሰማራ ጥሩ ነው። በዕውቀት ላይ የተመሰረተ ውጤታማ ሥራ ለመሥራት ይችላል። ነገር ግን ሰው የሚወደውን ነገር መሥራት እንዳለበት ደግሞ አምናለሁ ፤ምክንያቱም ሰው በራሱ ተነሳሽነት በፍላጎት ሲሠራ የሚሠራውን ሥራ የሚወደው ከልቡ በመሆኑ ውጤታማነቱም የዛኑ ያህል ከፍተኛ ይሆናል። አንድ ሰው በራሱ ወዶና ፈቅዶ የሚሰራው ሥራ ለደንበኛውም ለራሱም ታማኝ ሆኖ ሲሠራ ትክክለኛ የሆነም ሥራ ይሠራል። ለአዳዲስ የፈጠራ ሥራዎችም ይተጋል።
ማንኛውም ሰው ውጤታማ ለመሆን ግን ብዙ የሚያስፈልጉ ነገሮች ይኖራሉ። ከእነዚያ መካከል አንዱ የሥራ ሰዓትን በተገቢው መንገድ መጠቀም ነው። ለምሳሌ አንድ ሰው ሥራ ሲገባ ሰዓት ለመቁጠር ብቻ ብሎ በቦታው ላይ መገኘት ሳይሆን በተገኘበት ሰዓት በቂና ጥሩ ሥራ መሥራት አለበት። እኔ በምመራው ድርጅት ውስጥ ሠራተኞች መሥራት ያለባቸው የሥራ ሰዓት እንዳለ ሁሉ እኔ ግን በዚህ ሰዓት ውጡ ግቡ ወደሚለው አልሄድም፤ ምክንያቱም ድርጅቱ ውስጥ ብዙ በሠሩ ቁጥር ብዙ ገቢ ይኖራል፤ ድርጅቱ ገቢው ከፍ ባለ ቁጥር ደግሞ የሠራተኞቹ ክፍያ ያድጋል። ያንዱ ማደግ ለሌላው ማደግ ስለሚሆን ይሄንን እያሰቡ እንዲሠሩ ነው የማደርገው። እኔም የማስበው አብረውኝ የሚሠሩት የሥራ ባልደረቦቼ እኩል ተጠቃሚ መሆን አለባቸው ብዬ ነው። እኔ ሳገኝ እነሱም ያገኛሉ፤እነሱ ደግሞ የሚያገኙት ድርጅቱ ሲያገኝ ነው። ስለዚህ ሠራተኞቼ የሚሠሩት ሰዓት ጠብቀው ወይም ሰው አየኝ አላየኝ ብለው ሳይሆን ለራሳቸውም አብሮ ለማደግ በማሰብ ጨምር ነው።
በእኔ እምነት በወጣትነት ሁሉንም ነገር ማየት መሞከር ጥሩ ነው። ምክንያቱም ያየነው ነገር አዲስ አይሆንም፤ያየነውን ነገር ለመመራመርም የምንገፋፋ አንሆንም። ስለዚህ በወጣትነት ጊዜ ሁሉንም ነገር ማየትና መሞከር ጥሩ ነው ብዬ አስባለሁ። አብረውኝ ለሚሠሩ ሠራተኞቼም እንደ አለቃ ሳይሆን እንደ ወንድም የምመክራቸው ሱስ ውስጥ በሚያስገቡ ነገሮች ውስጥ እንዳይገቡ ነው፤ሱሰኛ ከሆኑ ግን ለሥራቸውም ሆነ ለዕድገታቸው መጥፎ መሆኑን ደጋግሜ እናገራለሁ። ወጣቶች እሚመኙበት ደረጃ ለመድረስ ዋናው ጉዳይ ለሱስ በሚያጋልጥ ነገሮች ላይ ማተኮር ሳይሆን ታታሪ ሆኖ መሥራት ብቻ ውጤታማ እንደሚያደርግ
መናገር እፈልጋለሁ።
የቤተሰብ ሁኔታ
የሁለት ልጆች አባት የሆኑት አቶ ነብየልዑል ወላጆቻቸው ካፈሯቸው አራት ልጆች እርሳቸው የቤቱ ሁለተኛ ልጅ ናቸው። ከእህቶችና ወንድማቸው ጋር ያላቸው ግንኙነትም በዕድሜ፣ በታላቅና ታናሸ አይደለም ፤እንደ ጓደኛ የሚያዩቸው እህቶቻቸውንና ወንድማቸውን ነው። እናትና አባታቸውንም ከወላጅነታቸው በተጨማሪ የቅርብ ጓደኞቸው፣ አማካሪያቸው መሆናቸውን ይናገራሉ። በሥራም በሌላውም ጉዳይ የሚያማክሯቸው፣የሚያወያዩቸው እነሱን ነው። ስለዚህ ቤተሰባቸው አስተማሪም፣ መካሪም፣ጥፋት ሲኖርም አራሚም ነውና ትልቅ አክብሮትና ፍቅር አላቸው።
ሠርግ
ለሰው ልጆች ሠርግ አስፈላጊ ነው የሚል እምነት ቢኖርም ሰርግን ሰርግ የሚያደርገው ግን ድግሱና የህዝብ ጋጋታ እንዳልሆነ ያምናሉ አቶ ነብየልዑል። እርሳቸውም የሠርግ ስነስርዓታቸውን ያደረጉት እጥር ምጥን ባለ መልኩ ጥቂት ሰዎች በተገኙበት መሆኑን ይናገራሉ።
ጋብቻ ባሰብንበት ወቅት ያደረግነው ዋናው ነገር ቤተሰቦቻችንን አሳምነን ለሠርግ የሚወጣውን ገንዘብ ብትሰጡንና ሥራ ብንጀምርበት የተወሰነውን ደግሞ የተቸገሩ ሰዎች ቢረዱበት የሚል ሃሳብ አቀረብን፤ በዚህ ሃሳብ እነሱም በመስማማታቸው በወቅቱ ለሜሪጆይ የበጎ አድራጎት ድርጅት እና ለሌሎችም ገንዘቡን ሰጥተን በቀሪው ደግሞ የራሳችንን ሥራ በማስፋፋት ጭምር ለመቋቋም ችለናል።
አሁንም እኔ እንደማምነው ሠርግን ማንዛዛት አስፈላጊ አይደለም የሚል ነው። የቅርብ ቤተሰቦችና ወዳጆችን ብቻ ጋብዞ ደስታን መካፈል ደግሞ አስፈላጊ ነው የሚል እምነት አለኝ። ሠርግ ላይ አላስፈላጊ ወጪ ከማድረግ ይልቅ ለቤተሰቡ ቀጣይ ህይወት መሰረታዊ በሆኑ ነገሮች ላይ ማተኮር።
ችግረኞችን መርዳት ወይስ ማገዝ ?
አባቴ ደጋግሞ የሚላት አንድ አባባል አለች። “ዓሣ እንዴት እንደሚበላ ሳይሆን እንዴት እንደሚጠመድ አሳይ”። ይሄ ማለት አንድን ሰው ችግረኛ ነው ብሎ ገንዘብ እየሰጡ ሁሌም ተረጂ ሆኖ እንዲቀጥል ከማድረግ ይልቅ በቀጣይ ህይወቱ እንዲለወጥ የማድረጊያውን መንገድ ማገዝ ማለት ነው። እኔም ሰዎች ተረጂ እንዲሆኑ ሳይሆን ታግዘው ከድህነታቸው እንዲወጡ ባግዝ ደስ ይለኛል።
በቀጣይ እቅዴም የተቸገሩ ወገኖችን ማገዝ እንዳለብኝ አስባለሁ። ይሄ ማለት ግን ገንዘብ በመስጠት ተረጂነታቸውን ዘላቂ ማድረግ ማለት አይደለም። የማስበው የተወሰኑ ችግረኛ ልጆችን ለትምህርታቸው ድጋፍ በማድረግ ማስተማር ነው። በዚህ በኩል የትምህርት ቤት እስፖንሰር ሽፕ ፕሮግራም ለመጀመር እቅዱ አለኝ።
ሌላው የጀመርኩትን ድርጅት ትልቅ ደረጃ ላይ አድርሼ መገኘት፣ አባቴ እንደሚለው ቢያንሰ ቢያንስ አባቴ የደረሰበት ደረጃ ለመድረስ ወይም ከዚያ በላይ ከፍ ለማለት ጥረት አደርጋለሁ። እዛ ደረጃ ለመድረስም ታትሮ መስራት ወሳኝ መሆኑን አምናለሁ ። የእግዚአብሄርን አጋዥነት ታክሎበት አሰብኩበት ደረጃ ለመድረስ እመኛለሁ።ለዚህምበታማኝነት፣በታታሪነት ጠንክሬ መሥራት መሥራት እንዳለብ አስባለሁ።
ዋሪት ማን ናት?
የድርጅቴ መጠሪያ ዋሪት የእንጨት ሥራዎች ይባላል። “ዋሪት” የሚለው የቤተሰባችን የብዙ ድርጅቶች መጠሪያ ሲሆን “ዝ” የሚለው ደግሞ መለያ ምልክታችን (ብራንድ) ነው። ዋሪት የአባቴ እናት የአያቴ ስም ነው። ስሙ አባታችን ለረጅም ጊዜ የተጠቀመበት መታወቂያው ነው። እኔም ይህንን ስም መጠቀሜ ለድርጅቴ እድገት ትልቅ አስተዋጽኦ አድርጎልኛል። በመሆኑም እኔ ተጠቃሚ ለሆንኩበት ለአያቴ ለስማቸው እከፍላለሁ፤96 ዓመት ዕድሜ ባለጸጋ የሆኑት አያቴም የምንከፍላቸውን ገንዘብ ሰብስበው ለሃይማኖታዊ አገልግሎት እና ለሚያሳድጓቸው ልጆችም አገልግሎት ላይ ያውላሉ።
የሴቶች ተሳትፎ
ሥራችን በአብዛኛው የሴቶችን ተሳትፎ የሚፈልግ ነው። በተለይ የማጠናቀቂያ(የፊንሺንግ) ሥራ በምንሠራበት ጊዜ ሴቶች በተፈጥሯቸውም በጣም ጠንቃቃና ኃላፊነት የሚሰማቸው በመሆናቸው በሽራው ላይ ይሰማራሉ። እንዲሁም ከፋይናንስ ጋር ተያይዞም ሴቶች ተመራጭ ናቸው። በመሆኑም በድርጅቱ ውስጥ የፋይናንስ፣ የፊኒሽንግ ሥራ፣ የሽያጭ ክፍል ኃላፊ ሆነው እያገለገሉ ያሉት ሴቶች ናቸው። በተሰማሩበት የኃላፊነት ቦታም እንዳሰብኩትም በጣም ውጤታማ ሆነው አግኝቻቸዋለሁ።
ምርቃት
እኔ በምርቃት አምናለሁ፤ የእናት የአባት ምርቃት የሚባል ነገር አለ። ይሄ ትልቅ ዋጋም አለው። የወገን ምርቃት በአጠቃላይ ለአንድ ሰው ጤንነትም ሆነ ስኬታማነት ትልቅ አስተዋጽኦ ያደርጋል።
አዲስ ዘመን ሚያዚያ 20 ቀን 2011 ዓ.ም
አልማዝ አያሌው
