![](https://press.et/wp-content/uploads/2022/03/epa-1-6-880x528.jpg)
ስፖርት ማሕበራዊ ክዋኔ እንደመሆኑ የተለያዩ ማሕበራዊ ጉዳዮችን መነሻ በማድረግ ውድድሮችን ማድረግ የተለመደ ነው። በተያዘው ወር በመከበር ላይ ያለውን ‹‹የሴቶች ቀን›› ምክንያት በማድረግም ሴቶችን ብቻ የሚያሳትፉ፣ የሚያፎካክሩና የሚያተጉ ውድድሮች ይደረጋሉ። ከእነዚህም መካከል ታላቁ ሩጫ በኢትዮጵያ በየዓመቱ ከሚያካሂዳቸው ዋና ዋና ውድድሮች አንዱ የሆነው የቅድሚያ ለሴቶች 5ኪሎ ሜትር ሩጫ ነው።
ትናንት ለ19ኛ ጊዜ መነሻና መድረሻውን አትላስ አካባቢ በማድረግ በተካሄደው ውድድር ላይም 10ሺ ሴቶች ተካፋይ ሆነዋል። ከታዋቂ አትሌቶች ባሻገር በመንግሥት የስራ ኃላፊነት ላይ ያሉ፣ በትምህርት ከፍተኛ ደረጃ የደረሱ፣ ስራ ፈጣሪዎች፣ በጥበባዊ ስራዎች ስኬታማ የሆኑ፣ በበጎ አድራጎት ዘርፍ የተሰማሩ እንዲሁም በተለያዩ ሙያዎች ዝናን ያተረፉና ለሌሎች ተምሳሌት የሆኑ ሴቶች በሩጫው ተካፍለዋል። ከኢትዮጵያውያኑ ውጪም የተለያዩ አገራት አምባሳደሮች፣ የውጭ ዜጎች እንዲሁም ጥሪ የተደረገላቸው እንግዶች የሩጫው ድምቀት ነበሩ።
የኢፌዴሪ ፕሬዚዳንት ሳህለወርቅ ዘውዴም ለሁለተኛ ጊዜ በስፍራው ተገኝተው ሩጫውን ያስጀመሩ ሲሆን፤ ለተሳታፊዎችም መልዕክት አስተላልፈዋል። በዚህም ‹‹ይህ ሩጫ የሚካሄደው በሴቶች ወር (ማርች) ነው። ብዙ የምንሰራው ስራ ስላለ የኛ የሴቶች ወር ማርች ብቻ ሳይሆን 365 ቀን ነው። ሴቶችን በማብቃት የሴቶች እኩልነትንና መብት በማስከበር ብዙ የተሰራ ቢሆንም፤ ብዙ ስራ ይጠብቀናል። በሩጫው በማሸነፍ መቻላችሁን አሳዩ፣ ነገር ግን ሩጫው አገርን ለማሳደግና ሴቶች የሚገባቸው ቦታ ለማድረስ ነው። ሩጫው ተግባብተን አንድ ላይ እንድንኖር ነው፤ ኢትዮጵያ ጊዜ የላትም እናንተንም ትሻለች›› ብለዋል። ሩጫው በሁሉም ስራ ላይ መሆን አለበትና በተለይ ሴቶችን የሚገባቸው ቦታ ላይ ለማድረስ የተጀመረውን ስራ ለማስቀጠል እንደሚገባ ያነሱት ፕሬዚዳንቷ ‹‹ለህልም ገደብ የለውም፤ ትልቅ ነገርን አልሙ ትደርሳላችሁ›› ሲሉም አበረታተዋል።
በታላቁ ሩጫ የቅድሚያ ለሴቶች ሩጫ አምባሳደር አትሌት መሰረት ደፋር በበኩሏ፤ ውድድሩ ከዓመት ዓመት እያደገና በርካታ ሴቶችንም እያሳተፈ ያለ መሆኑን ገልጻለች። ‹‹ይህ ውድድር ሴቶችን ብቻ በማሳተፍ በኢትዮጵያ የመጀመሪያው እንደመሆኑ ከጅማሬው አንስቶ የበርካታ ሴቶች መሰባሰቢያ፣ መገናኛ፣ መወያያና መነቃቂያ እንደመሆኑ ብዙ እድሎችን ይፈጥራል›› ስትልም ጠቀሜታውን ታስረዳለች። በርካታ አትሌቶች የሚሳተፉበት ውድድር እንደመሆኑም፤ ‹‹መሮጥ ከባድ ነገር ነው፤ በመሆኑም አትሌቶች ወደ ፊት ለመምጣትና ከፍተኛ ቦታ ለመድረስ ከባድ አይሆንብንም›› ስትልም የማበረታቻ መልዕክት አስተላልፋለች።
በአትሌቶች መካከል የተካሄደው ውድድርም ከፍተኛ ፉክክር የታየበትና ተቀራራቢ ሰዓት የተመዘገበበት ነበር። በውድድሩ አሸናፊ የሆነችው የኢትዮ ኤሌክትሪክ አትሌቷ ፋንታዬ በላይነህ ስትሆን፤ የገባችበት ሰዓትም 15 ደቂቃ ከ30 ሰከንድ ሆኖ ተመዝግቧል። ሶስት ሰከንዶችን ብቻ በመዘግየት ሁለተኛ ሆና የብር ሜዳሊያውን ያጠለቀችው የአማራ ማረሚያ ክለብ አትሌቷ መቅደስ አበበ፤ የክለብ አጋሯን ቃልኪዳን ፈንቴን በማስከተል ነበር የገባችው። አትሌቶቹ የሜዳሊያና የዋንጫ ሽልማት ሲበረከትላቸው፤ አሸናፊዋ አትሌት የ50ሺ ብር ተሸላሚ ሆናለች።
የሜዳሊያ ተሸላሚ አትሌቶቹ ከአዲስ ዘመን ጋዜጣ ጋር በነበራቸው ቆይታም፤ በውድድሩ ወቅት የነበረው ፉክክር እንዲሁም የአየር ሁኔታው ለመሮጥ ከባድ ቢሆንም በጥንካሬ ተቋቁመው ለአሸናፊነት መብቃታቸውን ጠቁመዋል። በቀጣይ ለሚካሄዱት የኢትዮጵያ አትሌቲክስ ቻምፒዮና እንዲሁም ለዓለም አትሌቲክስ ቻምፒዮና አገራቸውን ለመወከል በዝግጅት ላይ መሆናቸውንም አያይዘው ገልጸዋል። በአካል ጉዳተኛ ምድብ በበርካታ ጊዜ ተሳታፊነት በአሸናፊነት የምታጠናቅቀው አንቺነሽ ንብረት በዚህ ውድድርም አሸናፊ በመሆን የወርቅ ሜዳሊያ አጥልቃለች። ማህበረሰቡ ሴቶችን ከቤት ባለፈ ወደ ውጪ እንዲወጡ የማያበረታታበት እንደመሆኑ መሰል ውድድሮች መካሄዳቸው ዘርፈብዙ ጠቀሜታ እንዳለውም ገልጻለች።
ከአትሌቶቹ ሽልማት ጎን ለጎን በተምሳሌት ሴቶች፣ አምባሳደሮች፣ አካል ጉዳተኞች፣ የመሮጫ ቲሸርት በማሳመርና በሌሎች ዘርፎችም አሸናፊ ለሆኑ ተሳታፊዎች ሽልማት ተበርክቷል።
ብርሃን ፈይሳ
አዲስ ዘመን ሰኞ መጋቢት 5 ቀን 2014 ዓ.ም