አዲስ አበባ በቅርብ ወራት ውስጥ ዓለማቀፍ ጨዋታዎችን ወደ ማስተናገድ ትመለሳለች

ዓለም እና አህጉር አቀፍ የእግር ኳስ ጨዋታዎችን ጨምሮ ሃገራዊ ውድድሮች ዘለግ ላሉ ዓመታት በብቸኝነት ይስተናገዱ የነበሩት በአዲስ አበባ ስታዲየም መሆኑ ይታወቃል:: ከስፖርታዊ እንቅስቃሴዎች ባለፈ ማህበራዊ፣ ሃይማኖታዊ እንዲሁም ሌሎች ሁነቶችንም ለማስተናገድ ተመራጭ ስፍራ ሆኖ ቆይቷል:: ይሁንና በጊዜ ብዛት በማርጀቱና ሜዳውና ሌሎች አገልግሎት ሰጪ ክፍሎቹ ዘመኑን የሚመጥኑ ባለመሆናቸው የአፍሪካ እግር ኳስ ኮንፌዴሬሽን (ካፍ) ጨዋታዎች እንዳይካሄዱ እገዳ ካስተላለፈባቸው ስታዲየሞች መካከል አንዱ ሆኗል::

ይህንን ተከትሎም የኢፌዴሪ ባህልና ስፖርት ሚኒስቴር ስታዲየሙ የካፍን መስፈርት ባሟላ እንዲሁም በተሻለ ሁኔታ አገልግሎት ይሰጥ ዘንድ እድሳት እንዲያገኝ አድርጓል:: ከወራት በፊት እድሳቱ የተጀመረው አንጋፋው የአዲስ አበባ ስታዲየም በካፍ በተሰጠው አስተያየት መሰረት በዋናነት ለመስራት የታቀደው የእግር ኳስ መጫወቻ ሜዳ ፣ የተጫዋቾች የመልበሻ ክፍሎችን እንዲሁም ሌሎች አገልግሎት ሰጪ ክፍሎች መሆኑን በሚኒስቴሩ የፋሲሊቲ ዳይሬክተር አቶ አስመራ ግዛው ይገልጻሉ:: በካፍ ግብረመልስ የመልበሻ ክፍሎች ብዛታቸውም ሆነ ስፋታቸው በቂ አለመሆኑ የተጠቆመ ሲሆን፤ በዚህም መሰረት በአራት ክፍሎች የመከፋፈል ስራው ተጠናቋል:: ቀሪዎቹ ስራዎችም የፍሳሽ ማስተላለፊያ ቱቦዎችን ለመስራት እንዲሁም አስፈላጊውን የመልበሻ ክፍል ቁሳቁስ መግጠም ነው:: በተመሳሳይ የዳኞች ማረፊያ፣ የህክምና እንዲሁም የስፖርት አበረታች ንጥረ ነገሮች መመርመሪያ ክፍሎች ግንባታም መጠናቀቁን ያመላክታሉ::

በክረምቱ ምክንያት በሚፈለገው ልክ መስራት ያልተቻለው የሜዳው ስራም የክረምቱን ማብቃቱን ተከትሎ ወደ ቁፋሮ የተገባ ሲሆን፤ በዚህ ወቅትም ተጠናቆ የመጀመሪያ ደረጃ ስራው በመጠናቀቅ ላይ ይገኛል:: በቀጣይም የፍሳሽ ማስተላለፊያ ቱቦዎች ዝርጋታና ሌሎች ቀሪ ስራዎች በሶስት ወር ውስጥ ተጠናቆ የሳር ተከላው ይጀመራል::

ስራውን በአንድ ዓመት ውስጥ ለመስራት ታቅዶ ከወራት በፊት ወደ ተግባር ሲገባ አሁን ላይ አጠቃላይ ስራው 40 ከመቶ ላይ መድረሱንም ዳይሬክተሩ ያረጋግጣሉ:: በሶስት ወራት ጊዜ ውስጥም ከ80 በመቶ በላይ የሆነ አፈጻጸም ሊመዘገብ እንደሚችልና በጥቂት ጊዜ ውስጥም ሙሉ ለሙሉ የአንጋፋው ስታዲየም እድሳት ተጠናቆ ወደ አገልግሎት ይገባል የሚል እምነታቸውንም አንጸባርቀዋል::

የአፍሪካ መዲና እንዲሁም የተለያዩ ዓለም አቀፍ ተቋማት መቀመጫ የሆነችው ኢትዮጵያ ስፖርታዊ ውድድሮችንም ሆነ ሌሎች ጉዳዮችን ለማስተናገድ ተመራጭ ከሆኑት ከተሞች መካከል አንዷናት:: ይሁንና ስሟን የሚመጥኑ የስፖርት ማዘውተሪያ ስፍራዎች ባለመኖራቸው ምክንያት አህጉርና ዓለም አቀፍ ውድድሮችን የማሰናዳት እድሎችን ማግኘት አልቻለችም::

ያገኘቻቸውን እድሎችም በዚሁ ምክንያት መነጠቋ የሚታወስ ነው:: በኢፌዴሪ ባህልና ስፖርት ሚኒስቴርም ችግሩን ለመቅረፍ የሚያስችል ግዙፍና ዘመናዊ ብሄራዊ ስታዲየም እያስገነባ ይገኛል:: ይሁንና እንደሚጠበቀው ስታዲየሙ በአፋጣኝ አለመጠናቀቁ በስፖርት ቤተሰቡ ዘንድ ቅሬታን የሚያስነሳ ነው::

ዳይሬክተሩ ይህንን በሚመለከትም፤ የመጀመሪያው የግንባታ ምዕራፍ ውል የተፈረመው በ2008 ዓ.ም ቢሆንም እስካሁን ድረስ አለመጠናቀቁን በመመልከት የስፖርት ቤተሰቡ እንደ ጉድለት ያነሳዋል:: ይሁን እንጂ አስቀድሞ በታሰበው ጊዜ መሰረት ላለመሄዱ የመጀመሪያው ዙር ግንባታ ተጠናቆ ወደ ሁለተኛው ዙር ለመግባት ሲወጡ የቆዩት ዓለም አቀፍ ጨረታዎች በበቂ ሁኔታ ተጫራቾች ባለመገኘታቸው ለሁለት ዓመታት መቆየት የግድ ብሎ ነበር:: በመሆኑም ህብረተሰቡ በሚሰማው ስጋት ልክ ግንባታው የተጓተተ አለመሆኑን ያስረዳሉ:: ለማሳያ ያህልም ሜዳው ከመጀመሪያው ምዕራፍ ግንባታ ጋር የሚያያዝ በመሆኑ ሳር በማልበስ ጨዋታዎችን ማስተናገድ እንደሚቻል ዳይሬክተሩ ይጠቁማሉ:: ይሁን እንጂ ጣራው በሚተከልበት ወቅት ሊበላሽ ይችላል በሚል ስጋት ለማራዘም እንዳስፈለገም ያስረዳሉ::

በአሁኑ ወቅትም በዋናው ስታዲየም ዙሪያ የሚገነቡት 20 የሚሆኑ ሜዳዎች አብዛኛው ስራቸው ተጠናቆ የማጠቃለያ ብቻ ይቀራል:: የጣራ ተሸካሚ ቋሚዎች ግንባታ የተጠናቀቀ ሲሆን፤ የሚቀሩት ስራዎች በወራቶች ውስጥ ሊጠናቀቁ የሚችሉ ጥቂት ስራዎች ናቸው:: ከዚህ በኋላ የሚጀመሩት ትልልቅ ስራዎችም፣ የጣሪያ እና የቴክኖሎጂ ገጠማ ስራዎች ሲሆኑ በዚህ ረገድ ሊኖር የሚችለው ውስንነት እቃዎችን ለማስገባት አስፈላጊ የሆነው የውጭ ምንዛሪ ነው:: ለዚህ ይረዳ ዘንድም የተለያዩ ስልቶችን በመንደፍ እየተተገበረ ሲሆን በአጭር ጊዜ ውስጥም ለውጥ እንደሚመዘገብ ነው ዳይሬክተሩ የጠቆሙት::

 ብርሃን ፈይሳ

አዲስ ዘመን ኅዳር   15/2014