![](https://press.et/wp-content/uploads/2021/03/9667b67dabc4a69169c78ff8431bd7cf.jpg)
በዳግም ከበደ
የፋሽን ኢንዱስትሪው ሠፊ ዘርፍ ነው። በውስጡ በርካታ ሙያዎች አሉት። ይህን ጥቅል ዘርፍ ሙሉ ለሙሉ የመረዳት ችግር ኢትዮጵያ ውስጥ እንዳለ ይነገራል። በተለይ ሕብረት የጎደላቸው በተናጠል የሚደረጉ ጥረቶች የሚፈለገው ውጤት እንዳይመጣ እንቅፋት የሆኑም ይመሥላል። የዝግጅት ክፍላችን ለበርካታ ሣምንታት የፋሽን ኢንዱስትሪውን ኮኮቦችና ሥኬታማ ባለሙያዎች እንግዳ በማድረግ ተሞክሯቸውንና ያለፉበትን የሕይወት መሥመር አጋርቷችኋል። በዚህም መሠረታዊውን የፋሽን ዘርፍ እንቅስቃሴዎች ለመረዳት የሚያሥችል ግንዛቤ እንዳገኛችሁበትም እናምናለን።
በዚህ ሣምንት ደግሞ “ኢንዱስትሪውን ለማሣደግ ምን እናድርግ?” በማለት የዘርፉን ባለሙያዎች ሐሳብ ይዘንላችሁ ቀርበናል። እነርሱም ከራሣቸው ተሞክሮና የሥራ ልምድ ተነሥተው ቀላል የማይባል የመፍትሄ አቅጣጫን አመላክተዋል።
ኢንተርናሽናል ሞዴል ፈትያ ትባላለች።እንግዳችን አድርገናት ነበር። ዛሬም ሐሳቧን አጋርታናለች። ሞዴል ፈትያ የፋሽን ኢንዱስትሪው ዕድገት እያሣየ እንዲሄድ ጥረቶች እየተደረጉ መሆኑን ትገልፃለች። በተበታተነና በግል ጥረት ትላልቅ ደረጃዎች የደረሱ ባለሙያዎች መፈጠራቸውንም ትጠቅሣለች። ከዚህ ቀደም መረጃ በመስጠትና ዘርፉን በማሥተዋወቅ ረገድ የፋሽን መፅሔቶች በብዛት ነበሩ፤ አሁን ላይ ግን እነዚህ ጠፍተዋል የምትለው ሞዴሏ፣ ለኢንዱስትሪው ዕድገት የመገናኛ ብዙሃን ሚና ቁልፍ መሆኑን ትጠቁማለች።
“የኢትዮጵያን ባህልና የፋሽን ሐብቶች ለማስተዋወቅ ጥረት ይደረጋል። ሥኬትም እየተመዘገበ ነው” የምትለው ፈትያ፤ ከሁሉም በላይ ግን ዘርፉ የፋሽኑ ዓለም የደረሠበት ደረጃ እንዲሥተካከል ተበታትነው የሚገኙ ማህበራት፣ ባለሙያዎች እንዲሁም ውሥኑ የመንግሥት ድጋፍ ተጠናክሮ በሕብረት መጓዝ ያሥፈልጋል ነው የምትለው። እርሷም ያካበተችውን ልምድ በመጠቀም በግሏ ወጣቶችን ለማበረታታት በመሥራት ረገድ ሐላፊነትን ወስዳለች።
ምክረ ሐሳባቸውን ካጋሩን መካከል ሜካፕ አርቲስት አትክልት ለማ አንዷ ናት።አርቲስቷ በበኩሏ ኢትዮጵያውያን ወጣቶች አሁን ላይ ለፋሽን ልዩ ቦታ የሚሰጡ መሆናቸውን ትገልፃለች። በአጠቃላይ ኢትዮጵያዊ (ሐበሻ) መዘነጥና መልበስን የሚወድ ማህበረሠብ መሆኑንንም ታምናለች። ይሁን እንጂ የፋሽን ኢንዱስትሪውን በተሟላ መልኩ ለመፍጠር ብዙ ሥራዎች እንደሚቀሩ ትናገራለች።
“ቀደም ባሉት ጊዜያት ኢትዮጵያውያን በባህላቸውና በራሣቸው የፋሽን ሥልት ተውቦ ለመታየት ይጥሩ ነበር” የምትለው ባለሙያዋ፤ አሁን ላይ ደግሞ በተለየ መንገድ በማህበራዊ ድረ ገፅና በተለያዩ የመገናኛ ብዙሃን ይህን ልምድ በማሥፋት የፋሽን ኢንዱስትሪው እንዲያድግ እየሠሩ መሆኑን ትጠቅሣለች። ይሁን እንጂ ይኼ ጥረት በመንግሥት፣ በባለድርሻ አካላትና ልምድ ባላቸው ባለሙያዎች ተደግፎ መሥመር መያዝ እንደሚኖርበት ታመለክታለች። ከሁሉም በላይ ሕብረት አማራጭ የሌለው የዕድገት ምንጭ መሆኑን ነው የምትጠቅሰው።
ኢትዮጵያውያን ለዓለም ልናስተዋውቀው የምንችለው ቋንቋ፣ አለባበስ፣ አመጋገብና ሌሎች በርካታ ነገሮች እንዳሉን ጠቅሣ፣ ይህንን ለፋሽን ኢንዱስትሪው ለማዋል ከሌሎች መሠል አጋሮቿ ጋር በትብብር ለማሥተዋወቅ ቃል ገብታለች።
እንደ እሷ ገለፃ፤ ቀደም ባሉት ጊዜያት እርሷ ወደሙያው ሙሉ ለሙሉ ሥትገባ አጠቃላይ ማህበረሠቡ ለሜካፕ አርቲስት ሙያ እንዲሁም በአጠቃላይ ለሜካፕ ያለው ምልከታ በእጅጉ አናሣ ነበር። ለፈጠራ ውጤቶች የሚሰጠው ትኩረትም እንዲሁ የደከመ ነበር። ለሜካፕ አርቲስት ብቻ ሣይሆን በፈጠራ ሥራ ላይ በጥቅሉ የነበረው ትኩረት እዚህ ግባ የሚባል አልነበረም። ሙያው ላይ የሚገቡ ሰዎችም በልምድ የሚሠሩ ነበሩ። አሁን ይኼ እየተለወጠ ነው። በመሆኑም በየጊዜው መሠል ጥረቶች ማድረግ ከተቻለ ዘርፉ ሙሉ ለሙሉ የሚቀየርበት ጊዜ ሩቅ አይሆንም።
ሌላኛዋ እንግዳችን የአቢሲኒያ የሥነ ጥበብ ትምህርት ቤት መሥራችና ሥራ አሥኪያጅ ወይዘሮ ገነት ከበደ ናቸው። በኢትዮጵያ የሞዴሊንግ ትምህርት በዘመናዊ መንገድ መሰጠት ከጀመረ ረጅም ጊዜ እንዳላሥቆጠረ አሥታውሰው፣ እንዲያም ሆኖ ግን ጥቂት የማይባሉ ሞዴሎች በራሣቸው ጥረት ወደ እውቅናው ማማ ላይ ወጥተዋል ይላሉ።በዓለም አቀፍ ደረጃ የሀገራቸውን ሥም እስከማስጠራት የደረሱም እንዳሉ ይጠቅሣሉ።ይኼ ብቻ በቂ አለመሆኑን አመልክተው፣ ዘርፉ በኢንዱስትሪ ደረጃ ዕድገት እንዲያሣይ ከዚህ በተሻለ ጥረቶች ውስጥ ማለፍ ያሥፈልጋል ሲሉ ምክረ ሐሳባቸውን ይሰጣሉ።
“በአቢሲኒያ ሥነ ጥበብ ትምህርት ቤት ተምረው በተለያዩ ፊልሞችና ማስታወቂያዎች ላይ የምናያቸው ብዙ ናቸው” የሚሉት ወይዘሮ ገነት፤ የሥነ ጥበብና የሞዴሊንግ ትምህርቶች ከማሥተማሪያ ባለፈ ለመለማመጃ ሠፋ ያለቦታ እንደሚፈልጉ ይገልፃሉ።
የግለሠብ ቤት ተከራይቶ ትምህርቱን መስጠት ሥራውን አስቸጋሪ እንደሚያደርገው ጠቅሰው፣ የኪራይ ዋጋ በየጊዜው መጨመርን ተቋቁሞ ትምህርቱን ማሥቀጠሉ ፈታኝ እንደሚሆን አይካድም ይላሉ።እዚህ ላይ ነው የመንግሥት ድጋፍ ወሣኝ የሚሆነው ይላሉ።በተለይም ቦታ ከሊዝ ነጻ የሚያገኙበት ወይም ደግሞ ለተለያዩ አገልግሎቶች የሚውሉ ቦታዎች ይዘታቸውን ሣይለቁ ታድሰው እንዲጠቀሙበት ቢደረግ ዘርፉን ለማገዝ ያሥችላል የሚል ምክረ ሐሳብ ይለግሣሉ።ይህን ለማድረግ ሕብረት ዘርፉ እንዲያድግ ከፍላጎት የዘለለ ተግባር ላይ መግባት ግን ከምንጊዜውም በላይ ቀዳሚ መሆኑ ተናግረዋል።
ዲዛይነርና የፋሽን ባለሙያዋ ዮርዳኖስ አበራ በበኩሏ በተለያዩ አገራት የፋሽን ሾው የማሣየት አጋጣሚው ነበራት። በዚያ መልካም ተሞክሮ አይታለች። በዚያ የተመለከተችው በአገሯም ቢኖር ትሻለች።
እንደ እርሷ እምነት አሁን ላይ በኢትዮጵያ ሙያውን የመረዳትና በዲዛይነር የተሠሩ ማራኪ አልባሣትን የመጠቀም ፍላጎት በእጅጉ አድጓል። በተለይ በዚህ ሁለት ሦስት ዓመታት ውስጥ ከፍተኛ ለውጥ እየታየ ነው። አዲሱ ትውልድ አዲስ ፋሽን በቶሎ የመቀበል ባህሉ ፈጣን ነው።
ዲዛይነር ዮርዳኖስ መንግሥት የቱሪሥት መዳረሻ በሆኑ አካባቢዎች የኢትዮጵያ አየር መንገድን ጨምሮ የፋሽን ኢንዱስትሪ ማሣያ ቦታዎች ማዘጋጀት እንዳለበት ታምናለች። ለባለሙያዎቹም ቢሆን መሠል ምቹ አጋጣሚዎች መፍጠር የአገርን ምጣኔ ሐብት ከማሣደጉም በላይ የማንነታችን መሠረት የሆኑ ባህሎችን ለማስተዋወቅ ሠፊ ዕድል ይፈጥራል ብላ ታምናለች። መንግሥት ሐሳባቸውና ራዕያቸው እውን እንዲሆንም ከምንም በላይ ድጋፍ እንዲያደርግላቸው ነው አጥብቃ የጠየቀችው። እሷና መሠል ባለሙያዎችም በማህበር ተደራጅተው የፋሽን ኢንዱስትሪው ወደፊት እንዲራመድ እየሠሩ መሆኑንም አመልክታለች።
አዲስ ዘመን መጋቢት 20/2013