ተገኝ ብሩ
“ሰዎች ሊያደርጉላችሁ የምትወዱትን ሁሉ እናንተ ደግሞ እንዲሁ አድርጉላቸው::” ሁሉንም የእምነት ተቋማት የሚያቅፍ ወርቃማ አባባል:: ሃይማኖቶች ሁሉ በጎን ያዛሉ፤መልካም ያልሆነን ይከለክላሉ:: አማኞች ለእምነታቸው ከተገዙና እምነታቸው የሚያዘውን በትክክል ከተገበሩ ደግሞ ምድር ላይ መልካምነት ይነግሳል ፤የሰው ልጆች ኑሮ ሰላማዊ እንቅስቃሴያቸውም ፍሬያማ ይሆናል::
እውነት እኛ ግን በዚህ መልክ ወደ መልካምነት የሚጣራ ፍቅርን የሚያነግሰውና ጥላቻን የሚሽረው እምነት ላይ ነን? ይህ ነው የዛሬ የሀሳብ ውርወራ ማጠንጠኛ ሀሳቤ::
እምነት ፅኑ የሆነ የሰው ልጆች መንፈሳዊ መተዳደሪያ ነው:: ለሰዎች እምነታቸው ከሚገዙለት አምላካቸው የተቸራቸው ምድር መልካም ትሆን ዘንድ፤በእርሱ እንዲያምኑበትና እንዲገዙበት፣ መኖሪያቸው ላይ ፍትህ እንዲሰፍንና መፃኢ ህይወታቸው ዘላለማዊነት እንዲላበስ የሚያስችላቸው መሆኑን አምነው የተቀበሉት እውነታቸው ነው::
በዚህ እውነት ላይ ፅኑ ሆነው የመገኘታቸው ማሳያ ደግሞ ስነ ምግባርና ለተገኙበት ምድር የሚያበረክቱት በጎ ነገር ለሰው ልጆችና ህይወት ላላቸው ፍጥረታት በሙሉ መልካም መተግበርና ጥሩ ማድረግ ነው:: ነገር ግን ከዚህ በተቃራኒው ሰዎች እምነቱ የሚያዘውን መልካም ሆኖ መገኘትን ከተቃረኑ እምነታቸውን ተጠሩበት እንጂ አልኖሩበትም፤ እምነታቸውን ተጠለሉበት እንጂ ያዘዛቸውን አልተገበሩም ማለት ነው::
ስለዚህም ነው አሁን አገራችን ያለችበት ነባራዊ ሁኔታ መነሻ አድርጌ እኛ እምነት አለን እንጂ በእምነቱ አላደርንም ፤አማኞች እንባላለን እንጂ የምናምነውን በትክክል አልተገበርንም ማለቴ:: ስለዚህ ዓለም ኢትዮጵያውያን ፅኑ አማኞች ናቸው ቢለን ውሸት እኛ ለእምነታችን የተገዛን ህዝቦች ነን ብንል እብለት ነው::
እውን እኛ ኢትዮጵያውያን እንደሚነገርልን ከእምነታችን ጋር የተጎዳኘን በእምነታችን የፀናንና በትክክል እምነታችን የሚያዘውን የምንተገብር አማኝ ህዝቦች ነን? ለሚለው ጥያቄ ትክክለኛ መልስ ያስፈልጋል:: ያ ምላሽ የሚገለፅበትም እውናዊ ሁኔታ ምድር ላይ ያለው እውነታ የሚያሳይ መሆን ይገባዋል::
እኛ የሰዎች እኩል መሆንን አምነን ተቀብለን በተግባር እኩልነታቸውን አሳይተናቸዋል? የእኔ ዘር ከእንትና ዘር ይበልጣል ፣የኔ ነገድ ከእነ እንትና ነገድ የላቀ ነው ብለን ማመን ከተውንና አምላካዊውን ትዕዛዝ ካከበርን ስለምን ተለያይተን መቧደን ተራርቀን መዘላለፉ ወደኛ ይቀርባል:: ነገር ግን እምነቱን ስለተውን እምነቱ የሚያዘንን በትክክል ስላልተገበርን ወይም እምነታችን በትክክል ከእኛ ጋር ስላልተዋሀደ በተሳሳተ መንገድ እንጓዛለን፤ አማኝ ነን ማለታችን ፣የውሸት እምነት አለን ማለታችን ሀሰት ሆኖ ይገኛል::
የእምነት መነሻው በጎነት የሃይማኖት መዳረሻው መልካምነት ሆኖ ስለምን ከእምነት የሚያርቁ ተግባራት በዚህች ምድር በረከቱ? ስለምንስ ትውልዱ ከስነምግባር ራቀ? በዘር ተለያይቶ መናቆሩ፣
እንደ ህዝብ አማኝ ሆነን ሳለን እነዚህ አሉታዊ መገለጫዎች እኛ ላይ በብዙ ማሳያዎች መገለፃቸው እውነት ነው:: የእኛ አማኞች መሰኘትና ተግባራችን ለየቅል መሆን እምነታችንን የውሸት አያስመስለውምን? የሰዎችን መንፈሳዊ ቅቡልነት አግኝተው የሚተገበሩ የየእምነቱ ህግጋትና ትዕዛዞች ሁሉ ሲመረመሩ አላማቸው በጎነት መስበክ መልካምነት ማንገስና ስነምግባር ማነፅ ነው::
አንድ አማኝ ነኝ ፤በእምነቴም በትክክል ቆሜያለሁ የሚል ሰው አምላኩ የሰው ልጆችን እንዴት እንደፈጠረ በደንብ አምኖ ከተቀበለ በኋላ እኔ የዚህ ወገን ነኝ ስለዚህ ከእነ እንትና እሻላለሁ ወይም ያነስኩ ነኝ ሊል እንዴት ይችላል? የሰውን ልጅ መጀመሪያ ወይም መነሻ እያወቀ አዳምና ሄዋን /አደምና ሀዋ/የሰው ልጆች አባትና እናት መሆናቸውን ከተቀበለ በኋላ ሰዎችን እንዴት አበላልጦ ሊያይ ይችላል?
ትክክለኛ አማኝ ምድር ላይ ያሉ ሰዎች ሁሉ መነሻቸው አንድ መሆኑን ያምናል::የሰዎችን እኩልነት መካድ፣ የሰው ዘር የተለያየበት ምክንያት ታላቅ ሚስጥር መሆኑን ማስተባበል አይችልም:: እኔ በትክክልም እምነቴ የሚያዘኝን እፈፅማለሁ ካለ፤ለሰዎች መልካም ማድረግ ለአዳም ልጆች ፍቅር መስጠት ዋንኛ ተግባሩ መሆኑን ይረዳል:: ለምድር ሰላም መስፍን የራሱ የሆነ በጎ አስተዋፅኦ ያበረክታል::
ስለዚህ ይሄንን ጥያቄ በወጉ የሚመልስልኝ እንዲሁም አሳማኝ የሆኑ ማሳያዎች የሚያመላክተኝ ወገን እስካገኝ እኔ ይህን አልኩ:: እኛ ኢትዮጵያውያን እምነት አለን እንጂ በትክክል ለእምነታችን አናድርም፤ አማኞች ተባልን እንጂ የአማኞች ስነ ምግባርን የእምነታችንን ህግ አናከብርም:: የእምነት ምድር የአማኞች መገኛ ናት የምትባለው ኢትዮጵያ ዛሬ ላይ አማኙ ከእምነቱ የራቀበት ሆኖ ታየኝ::
በምድር ላይ የእምነትን ያህል ሰዎች የሚገራ የሃይማኖትን ያህል ስብዕናን የሚያንፅና ትውልድን የሚቀርፅ መሳሪያ ፈልጎ ማግኘት ይከብዳል:: የሰው ልጅ ለአምላኩ ህግ ሲያድር ምድር ሰላምዋን ታገኛለች፤ በጎ ተግባራት ላይ ሲያዘወትር ምድር ላይ መልካምነት ይነግሳል፤ አድሎአዊነት አቅም ያጣል ፍትህ በአገር ምድሩ ይሰፍናል::
በመሆኑም በስነምግባር የታነፃና አገር ወዳድ ዜጋ መፍጠር ይቻል ዘንድ የእምነት ተቋማት የራሳቸውን ትልቅ ሚና ሊጫወቱ ግድ ይላል:: ሁሉም ሃይማኖቶች አስተምሮዋቸው ወደ መልካም ነገር መጣራት ሆኖ ሳለ አማኞቻቸው የሚገኙበትን ሁኔታ አጢነው ከራሳቸው ጋር መማከርና ትክክለኛውን የእምነት ፅንሰ ሀሳብ ለአማኞቻቸው ማቅረብና ማነፅ ይኖርባቸዋል::
ኢትዮጵያውያን አማኞች ናቸው ለእምነታቸው ታላቅ ክብር አላቸው እየተባለ የሚነገረው ተምሳሌትነት በትክክል እዚህች ምድር ላይ ካልታየ በቀር ምኑ የእምነት አገርና አማኝ ህዝብ ያሰኛል:: አምላክ የሚፈቅደው የእርስ በርስ መፈቃቀርና መከባበር ካልተንፀባረቀ፣ጥላቻ ካልተሻረ፣ፍቅር ካልፀደቀ የአማንያን እምነት ላይ ናቸው መባል በምን ሊረጋገጥ ይችላል:: ስለዚህ እምነታችንን ተሸሸግንበት እንጂ አልኖርንበትም:: አማኞች ናቸው ተባልን እንጂ የምር እምነቱን አላንፀባረቅንም የማለቴ መነሻ ይህ ነው::
በቅርቡ የኢትዮጵያ የሃይማኖት ተቋማት ጉባዔ የተመሰረተበትን 10ኛ ዓመት ሰሞኑን ማክበሩ ይታወሳል:: እነዚህ ለሰላማዊ የእርስ በርስ ግንኙነትና የአብሮነት እሴት መጎልበት አንዳች ነገር ለመፈየድ የተሰባሰቡ ተቋማት የአማኞቻቸውን የእርስ በርስ በጎ ግንኙነት በማጎልበትና መልካም የሆነ አገራዊ ገጽታን በመገንባት በኩል ምን ሰሩ የሚለውን መፈተሽ ይገባል:: ተቋሙ የተመሰረተበት ዓላማ ግልፅ ነው:: ሃይማቶች ተቻችለው፤አማኞች ተከባብረው እንዲኖሩና ዘላቂ ሰላም በማስፈን አገራዊ አንድነት ማጠንከር ነው::
የአማኞች ሀገር በምትባለዋ ሀገራችን ባለፉት የለውጥ ዓመታት እዚህም እዚያም ግጭቶች ይቀሰቀሱ ነበር፤ ተቋሙ የተለያዩ የእምነት ተቋማት አማኒያን ተቻችለው እንዲኖሩ ለማድረግ ብዙ ሰርቷል:: አሁንም የእምነቶቹ ተከታዮች የእምነታቸውን አስተምህሮዎች ተከትለው እንዲኖሩ ለማድረግ መሰራቱን አጠናክሮ መቀጠል ይኖርበታል::
የአማኞች አገር የተባለችው ኢትዮጵያ የእውነት አማኞች የበዙባት በዚህም መልካምነት በዝቶ፣ በጎነት በርክቶ፣ ሰላም ሰፍኖባት ትታይ ዘንድ፤የሃይማኖት ተቋማት ትልቅ ኃላፊነት አለባቸው::በሌላ በኩልም ሃይማኖቶች ተቀራርበው እርስ በርስ ለመስራትና ዜጎችን በስነምግባር ለማነፅ ብሎም ለአገር በጎ ነገር ማበርከት እንጂችሉ ማስተማር ይገባቸዋል::
የሁሉም እምነት የሚያዘው በጎ ነገር በትክክል ለመተግበር ሁሉም አማኝ ከተነሳ ሁሉም አንድ አላማ ይኖረዋል:: ዓላማው ደግሞ ሰላም፣ፍቅርና አንድነት ነው::ስለዚህ የእውነት አምነን በትክክል እምነቱ መተግበር የሁላችን ኃላፊነት መሆን ይገባዋል:: አበቃሁ፤ ቸር ይግጠመን
አዲስ ዘመን መጋቢት 7/2013