ዳግም ከበደ
ከዚህ ቀደም በፋሽን አምድ ላይ ስለ ፋሽንና እርሱን አስመልክተው በሚዘጋጁ ሳምንቶች ዳሰሳ ማድረጋችን ይታወሳል። ለዛሬ ደግሞ ይህን ዘርፍ ሙሉ ከሚያደርጉ ሙያዎች ውስጥ ቀዳሚ ስፍራ ከሚሰጣቸው መካከል አንዱ የሆነውን የፎቶግራፍ ሙያና የፋሽን ቁርኝትን ለመዳሰስ ወደናል። ወደዚህ ጉዳይ በቀጥታ ከመግባታችን በፊት ግን በዓለማችን ላይ ቅንጡነትንና ውበትን ለሚያጎናፅፉ የፋሽን ሳምንታት የተወሰኑትን እነሆ።
እንደ መንደርደሪያ
የፋሽን ሳምንቶች ለህዝብ ክፍት በሆኑ ቦታዎች ላይ አልባሳትና ጌጣጌጦችን በማሳየት የሚደረጉ ዝግጅቶች ናቸው። ይህ አይነት ፅንሰ ሃሳብ በይፋ መተዋወቅ የጀመረው በፈረንሳይ ፓሪስ ከተማ ነበር። በዋናነት አዳዲስ አልባሳትንና የመዋቢያ ጌጣጌጦችን ለገበያተኛው ማቅረብ በሚያስፈልግበት ወቅት ዲዛይነሮችና የፈጠራው ባለቤቶች በፓሪስ ጎዳናዎች ላይ ቆነጃጅቶች ስራዎቻቸውን እንዲያሳዩላቸው መመልመል ጀመሩ። በዚህም በአደባባዮችና ለእይታ ምቹ በሆኑ ስፍራዎች ላይ በዲዛይነሮች የተሰሩ የመዘነጫ ቁሳቁስን በይፋ አስተዋወቁ። ይሄ እንቅስቃሴ ቀስ በቀስ የፋሽን አብዮቶች በመሆን እነዚህን ተወዳጅ ሳምንታት መፍጠር ቻለ። በፈረንጆቹ የዘመን አቆጣጠር ከ1900 እና ከዚያ በፊት የፋሽን ሳምንታት ቀስ በቀስ እያደጉ የመጡበት ጊዜያት እንደሆኑ ይነገራል።
ፎቶግራፍና ፋሽን
ፋሽን ሞዴሊንግን፣ ዲዛይንና ሌሎች ጥበባዊ ውጤቶችን አካትቶ የሚይዝ ተወዳጅ ዘርፍ ነው። በዚህ ሙያ ውስጥ የሚገኙ የፈጠራ ባለሙያዎች ስራዎቻቸውን ለዓለም እንዲያስተዋውቁ ደግሞ ፎቶግራፍና ባለሙያዎቹ እጅግ ቁልፍ ሚና ይጫወታሉ። ይህ ብቻ ሳይሆን የፋሽን አልባሳትና ሌሎች የፈጠራ ውጤቶች በፎቶግራፍ አማካኝነት ለተለያዩ የማህበረሰብ ክፍሎች ሲደርሱ ደግሞ ስራዎቻቸው ላይ ያሉትን መልካም ጎንና መሰል አስተያየቶችን በቀላሉ ለማግኘት ያስችላቸዋል።
ማህበራዊ ድረ ገፆችና መገናኛ ዘዴዎች ልክ እንደ አሁኑ ባልተስፋፋባቸው በእነዚያ ጊዜያት የፋሽን ወዳጆች በቀላሉ ዲዛይነሮችና የፈጠራ ባለሙያዎች ይፋ የሚያደርጓቸው አልባሳት፣ የመዋቢያ ቁሶችና ጌጣጌጦችን ለመመልከት አጋጣሚው አልነበራቸውም። ይህ ደግሞ የፋሽን ውጤት ተከታይና አድናቂዎች በቀጥታ ተሳትፎ
ለማድረግ ምቹ ሁኔታ አልፈጠረላቸውም።
አሁን ላይ ከህፃን እስከ አዋቂ ሁሉም ሊባል በሚችል መልኩ የፌስቡክና መሰል ማህበራዊ ገፅ አካውንቶች አሉት። ይሄ ደግሞ ለፋሽን ውጤት አድናቂዎችና ዲዛይነሮች ልዩ አጋጣሚ ፈጥሯል። ዲዛይነሮች በቀላሉ በፎቶግራፍ አማካኝነት ስራዎቻቸውን በማህበራዊ ገፆች ሲያጋሩ አድናቂና ተከታዮቻቸው ደግሞ የሚወዱትን ስራ ብዙ ሳይለፉ የመመልከት እድሉን ማግኘት ችለዋል። ከዚህ ባለፈ ጥሩም ይሁን መልካም አስተያየቶችን ለመለዋወጥ ችለዋል። በዚህ ምክንያት ነው ፎቶግራፍና የፎቶ ባለሙያዎች በፋሽን ኢንዱስትሪው ላይ ከፍተኛ አስተዋፆኦ እንዳላቸው እንዲታመን ያደረገው። ዲዛይነሮችም ይህን ተጨማሪ እድል በማግኘታቸው ስራዎቻቸውን ሳይለፉ ለማስተዋወቅ የቻሉት።
ቦታው ድረስ እንደመገኘት
በመግቢያችን ላይ ለማንሳት እንደሞከርነው በዓለማችን ላይ እጅግ ብዙ የፋሽን ሳምንቶች ይዘጋጃሉ። በርካታ ሺህ የፈጠራ ባለሙያዎች፣ ሞዴሎችና የጥበቡ ዓለም ባለሙያዎችም ስራዎቻቸውን ያቀርባሉ። በሚሊዮኖች የሚገመቱ የፋሽኑ ዓለም አድናቂዎችም በቀጥታ በነዚህ ተወዳጅ ዝግጅቶች ላይ ይካፈላሉ። ታዲያ ከእነዚህ ቁጥራቸው ከበዛው አድናቂዎች በተለየ መንገድ በርካታ ሚሊዮን ሰዎችም በተለያዩ አማራጮች የሚወዱትን ትእይንት ይታደማሉ።
ይህን እድል ከሚፈጥሩት የሙያ ዘርፎች ውስጥ አንዱ ደግሞ የፎቶግራፍ ሙያ ነው። በተለያዩ ተወዳጅ የፋሽን ሳምንቶች ቁጥራቸውን መገመት የሚከብዱ ብቃታቸው ጫፍ የደረሰ ፎቶግራፍ ባለሙያዎች ይገኛሉ። ባለሙያዎቹ በካሜራዎቻቸው የሚያነሷቸውን አስደናቂ ምስሎች በድረ ገፆቻቸውና በማህበራዊ ገፆች ያሰራጯቸዋል። ዝግጅቶቹ ተጠናቀው ሳያበቁ ድባቡ ሳይፋዘዝ ፎቶግራፎቹ እያንዳንዱ ፈላጊያቸው ደጃፍ ይደርሳሉ። ይሄ መልካም አጋጣሚ ሚሊዮኖች በእያንዳንዱ አገርና የፋሽን ሳምንታት የሚሳተፉበትን አጋጣሚ ባያገኙም እንኳ ቦታው ላይ የመገኘት ያህል ልዩ ስሜት የሚፈጥሩትን የፎቶግራፍ ውጤቶች የመመልከት አጋጣሚውን ያገኛሉ።
ያን ጊዜ ነው ፋሽንና ፎቶግራፍ ቁርኝታቸው ጎልቶ የሚወጣው። አሁን አሁን እነዚህን ሁለት ሙያዎች ነጥሎ መመልከት እስኪከብድ ድረስ ትስስራቸው ጥልቅ ሆኖ ይስተዋላል። የጥሩ ዲዛይነር አልባሳት ውጤቶች ድንቅ ችሎታ ያለው የፎቶ ባለሙያ ሲነሳ የፋሽኑ ዓለም ተከታይና ደንበኞች አይናቸው በቶሎ የሚወዱት አልባሳትና መዋቢያ ጌጦች ላይ በቀላሉ ማረፍ ይችላል።
ምን ይሄ ብቻ የዲዛይነሮች ስራ በእይታ ውስጥ እንዲገባ ለማስቻል ሞዴሊንግ ትልቁን ሃላፊነት ይወስዳል። በአልባሳቱም ሆነ በጌጣ ጌጦቹ ተውበው የሚታዩት ሞዴሎች ደግሞ በፎቶግራፍ ባለሙያዎች ቅንጡ የፎቶ አነሳስ ዘዴ ደምቀው እንዲታዩ ይሆናል። ያን ጊዜ ነው አዳዲስ የፋሽን ውጤቶች ከአለማችን ውብ ከተማዎችና ወጣት ዘመናዊነት ተከታዮች ዘንድ የሚደርሱት።
ፋሽንና ፎቶግራፊ በኢትዮጵያ
ባህላዊ ሃብቶቻችንን ለቀሪው ዓለም ከምናስተዋውቅበት መንገድ አንዱ የፋሽን ኢንዱስትሪው ነው። ዘርፉ እንዲመነደግ ደግሞ በዛሬው ርዕሳችን ላይ እንዳነሳነው ፋሽንና ፎቶግራፍ ጥብቅ ቁርኝት መፍጠር ይኖርባቸዋል። ይህ ዘርፍ በአይነቱ ብዙ መንገዶች እድገት አሳይቶ ስኬት ላይ የሚደርስ ከሆነ፣ በኢትዮጵያ ውስጥ ያሉ ባህላዊ እሴቶቻችንን ሳንበርዝ ለቀሪው ዓለም ማስተዋወቅ ያስችለናል። ከዚህ ባለፈም አገራችን ኢትዮጵያ የፋሽን ቱሪዝም ተደራሽ ሆና ኢኮኖሚያዊ ተጠቃሚነት እንዲኖራት ያስችላል። አሁን አሁን ፋሽንና ፎቶግራፊ በአገራችን ኢንዱስትሪ ውስጥ መልካም ውጤት ላይ እየደረሰ ለመሆኑ ማሳያ የሚሆኑ የማህበራዊ ድረ ገፅ እንቅስቃሴዎችን ማስተዋል ይቻላል።
በኢንስታግራም ላይ ዲዛይነሮች ስራዎቻቸውን በጥሩ የፎቶግራፍ ባለሙያ እያስነሱ ማቅረብና ማስተዋወቅ እየቻሉ ነው። በዚህ የመገናኛ ዘዴ ብቻ ሳይሆን በሌሎች መሰል አማራጮችም ዲዛይነሮችና የፈጠራ ባለሙያዎች አእይምሯዊ ውጤቶቻቸውን ይፋ እያደረጉ የአድናቂዎቻቸውን መልካም ምላሽና ተሳትፎ እያገኙ ነው። ይህ ግን ጅምር ላይ ያለ ስለመሆኑ መገንዘብ ያስፈልጋል። የፋሽኑ ዓለም የደረሰበት የዘመናዊነት ጫፍ ለመድረስ ግን ገና ብዙ ብዙ መስራት እንደሚያስፈልግ ለመጠቆም እንወዳለን።
ከላይ ያነሳነው ጥረት ለስኬት እንዲበቃ ዓለም አቀፍ የፋሽን ሳምንቶች በአገራችንም በስፋት ሊለመዱ ይገባል። ያን ጊዜ የተፈለገው ግብ ላይ ለመድረስ ሰፊ መንገድ ማበጀት ይቻላል። የዛሬው ርዕሰ ጉዳይ የሆነው የፋሽንና ፎቶግራፍ ዝምድናንም እድገቱ በሚያመጣው አጋጣሚ በቀላሉ እንመለከተዋለን ብለን እናምናለን። ቸር እንሰንብት!!
አዲስ ዘመን መጋቢት 6/2013