ተገኝ ብሩ
ራሴን መቆጣጠር ቸገረኝ። የሰማሁትን ላለማመን፤ የሆነውን ለመቀበል እየሞከርኩ ነው። ባለቤቴ አይኖቹ በእንባ ርሰው እግሬ ስር ተደፍቶ “የኔ ልዕልት አዎ በድዬሻለው ይቅር በይኝ…የፈፀምኩት ተግባር ፍፁም ስህተት ነው። ለአንቺ ይሄ አይገባሽም ውዴ…በደሌ ቀና ብዬ እንዳላይ አድርጎኛል፤ የሰራሁት አሳፍሮኛል ፤ እባክሽ ይቅር በይኝና ዘላለም ተንከባክቤ ልካስሽ” እያለ ይማፀነኛል። እንዲህ ስብር ብሎ አይቼው አላውቅም፤ ካገኘሁት ቀን ጀምሮ በዚህ መጠን በጥላቻ ተመልክቼውም አላውቅም። እግሬ እንዳልነቃነቅ ጥፍር አድርጎ ይዞኝ ኃጢያቱን መናዘዙን ቀጥሏል።
አደረኩት የሚለኝን ማመን ተስኖኝ፤ የሆነው ግራ ገብቶኝ፤ የምሰማው አስፈርቶኝ ደንዝዤ ቆሜ እመለከተዋለሁ። ህፃንዋ ልጄ አልጋ ላይ እንዳስተኛኋት እርታዋን ታቀልጠዋለች። ለስዋ ምላሽ የሚሰጥ ጉልበት አጣሁ፤ ጉልበቴ በድንጋጤ ራደ። ሄጄ እንደሌላው ጊዜ እንስቼ አቅፌ አይዞኝ ልላት፤ላባብላት እንዳልችል ሆኜ ደንዝዣለሁ። ድምፅ ከመስማት ውጪ እየሆነ ያለውን ነገር መለየት እስኪሳነኝ ድረስ ፈዝዣለሁ።
እንዴ ምን ላይ ነው ያለሁት? ምን እየሆነ ነው? በፍፁም አላምንም። ይሄ የሚሆነው እኔ ላይ ነው? ውዱ ባሌ የሚያፈቅረኝና የኔ የምለው ሰው ነው እኔ ላይ ያደረገው? አይ በፍፁም ይሄ ህልም ነው። ከዚህ አስቀያሚ ህልም መንቃት እፈልጋለሁ። ከዚህ የሚጨንቅ ስሜት በፍጥነት መላቀቅ እፈልጋለሁ። ከቅዠቴ የሚያነቃኝ ሰው ናፈኩ። ንቅትቅት ብዬ ከዚህ ቅዤት ከሞላበት ዓለም ተገላግዬ ወደነበርኩበት መመለስ እፈልጋለሁ።
ባለቤቴ ነጋዴ ነው :: እኔ ደግሞ የምወደውና ደስ ብሎኝ የምሰራው ያለኝ የመንግሥት ሰራተኛ ነኝ። የምሰራበት ተቋም ውስጥ ለረጅም ዓመታት በሂሳብ ሰራተኛነት ሰርቻለሁ። የወሊድ ፍቃድ ወጥቼ ለወራት ቤቴ ቆይቻለሁ። ባለቤቴ እጅግ በጣም ይወደኛል፤ይንከባከበኛልም። ክፍለ አገር ያሉ ቤተሰቦቼ ፈፅሞ እንዳይናፍቁኝ ብቸኝነትም እንዳይሰማኝ ያደረገኝ ከአምላክ የተሰጠኝ ውድ ስጦታዬም ነው። በልዩ ፍቅርና መተሳሰብ ምንም ሳያጓድልብኝ ለ4 ዓመት ያህል አብረን ቆይተናል።
ለመውለድ ከተስማማን በኋላ የቤት ውስጥ ስራ ፈፅሞ እንዳልነካ ያዘኝ ነበር፤ ጥሩ ሰራተኛ ቀጥሮልኝ ሁሉ ነገር እስዋ እንድትሰራ አደረገልኝ። የመንግስት ስራዬን እንዳቆም ደጋግሞ ቢጠይቀኝም በራሴ የምተማመንና የራሴ የሆነ ሥራ ያለኝ ሴት ሆኜ መገኘት ስለምወድ ፍቃደኛ አልሆንኩለትም። ለመውለጃዬ ጥቂት ቀን እኪቀረኝ ድረስ ሥራዬ ላይ ብቆይም እርሱ ትጎጃለሽ ለልጃችን ጥሩ አይደለም እያለ ይወተውተኝ ነበር። እኔ ግን ከወሊድ በኋላ ሰፋ ያለ ጊዜ ከልጄ ጋር እንዲኖረኝ ፈልጌ መውለጃዬ ሲቃረብ ከስራ ወጣሁ።
የመውለጃዬ ቀን እስኪደርስ ከወትሮው በተለየ እቤት መዋሌ አንድ ነገር በተደጋጋሚ እንዳይ አደረገኝ። እኔ ቤት መስኮት ላይ ሆኜ ከቤቴ ፊት ለፊት በተደጋጋሚ አየው የነበረው ነገር ትኩረቴን ስቦት ጭራሽ ሰዓቱን እየጠበኩ መከታተል ጀመርኩ። መጀመሪያ ላይ በተደጋጋሚ ወደ መኝታ ቤቴ መስኮት ጠጋ ብዬ ስቆም ከፊት ለፊት አየው የነበረው ልዩ ትይንት ያስገርመኝም ጀመር።
የመኖሪያ ቤቴ መኝታ ክፍል አንደኛ ፎቅ ላይ በመሆኑ ከፊት ለፊት የተንጣለለ ግቢ ያላቸው መኖሪያ ቤቶች ይታያሉ። ከነዚያ ቤቶች አንዱ ላይ ነው እከታተለውና መጨረሻ ላይ ወደኔው ቀርቦ ያገኘሁትን ጉዳይ የተመለከትኩት። ወደዚህ ሰፈር የገባነው ቅርብ ጊዜ ነው። ባለቤቴ በንግድ ስራ ከፍ ያለ ገቢ ስለሚያስገኝለት ውድ በሆነ ዋጋ ከመሀል ከተማ ወጣ ያለ የመኖሪያ መንደር ላይ የሚያምር ቤት ገዝተን ነው የገባነው። ገና ከአካባቢው ሰው በደንብ አልተግባባንም። ነገር ግን ሰሞኑን የተለየ ነገር የማይበት ቤት ባልና ሚስቱ ጋር ተግባብተን ተጠራርተን ሁላ ቤተኛ ሆነናል።
ጎረቤት የሆኑት ባልና ሚስት ጠዋት 2 ሰዓት ላይ ወደ ስራ አብረው ይወጣሉ። ነገር ግን ብዙም ሳይቆይ ሰውየው ተመልሶ ወደ ቤት ይመጣና ለ1 ሰዓት ያህል ቆይቶ ተመልሶ ይወጣል። ቆይቶ ሲወጣ ግን የማየው ተግባሩ አንድ ነገር እንድጠረጥር አደረገኝ። ሰውየው ከቤት ሰራተኛው ጋር ያልተገባ ቅርርብና መሳሳም ሲያደርግ አየሁት። ሰውየው እቤቱ ስሄድ ከማውቃት መልከኛ ሰራተኛው ጋር የሆነ የተለየ ግንኙነት የጀመሩ መሰለኝ። ሚስቱ ስራ ቦታ አድርሷት ተመልሶ ወደቤቱ የሚመለስበት ምክንያት እሱ ስለመሆኑ ነገሩ ሁኔታው ሲደጋገም ገባኝ። ጭራሽ ከሰራተኛው ጋር በር ድረስ ተቃቅፈው ይሸኛኙ ጀመር።
የማየው ነገር ከእለት ወደ እለት እያናደደኝ መጣ። በሰውየው እምነት አጉዳይ መሆንና በባለቤቱ ደግሞ ሳታውቅ መጎዳት መብሸቅ ጀመርኩ። እቤታቸው ድረስ ሄጄ ጉዳዩን በሌላ መልክ ለመከታተል ስሞክር የሰውየውና የሰራተኛዋ ሁኔታ ይበልጥ እርግጠኛ እንድሆን አረገኝ። ለሚስቱ መንገርና ጉዳዩን ማሳወቅ ብፈልግም የትዳራቸው መፍረስ አሳሰበኝ። ዝም ማለት ደግሞ ለኔ እንደ ኃጢያት መስሎ ታየኝ። መውለጃዬ ቀኑ ደርሶ ሆስፒታል ሄጄ ከተገላገልኩ በኃላ ሶስት ቀናት ቆይቼ እቤቴ ተመለስኩ።
ከቀናት በኋላ ከአልጋዬ ተነስቼ ቤቴ ውስጥ መዋል ስጀምር ያ ከመውለዴ በፊት አየው የነበረው ጉዳይ እንደነበር መቀጠሉን መመልከት ጀመርኩ። ሚስኪን የሰውየው ሚስት እኔንን የአራስ ምርቃት ብላ ልትጠይቀኝ መጥታ ብዙ አወራን። ለባልዋ ያላትን ፍቅር ስትነግረኝ ውስጤ እያረረ ዝም ብዬ ሰማኋት። ይበልጥ የዋህነትዋን ተረዳሁ። አሳዘነችኝ። የባልዋን ስራ ብነግራት ምን ያህል እንደምትጎዳ ሳስብ ይበልጥ ጨነቀኝ። በዚህ መሀል ጉዳዩ ላይ ከባሌ ጋር ለማውራት አሰብኩ። እናም አንድ የሚያሳስበኝ ጉዳይ እንዳለና እንደምፈልገው ነግሬው ማውራት ጀመርን።
ስለሰዎቹ ማንነት ሳልነግረው እንዲህ አይነት ጉዳይ ቢፈጠር ምን ታደርግ ነበር ብዬ ጉዳዩ እየከነከነኝ ነገርኩት። እየነገርኩት ሳለ ግን አይኑ በእንባ ርሶ በተስፋ መቁረጥ ስሜት ብድግ ብሎ እግሬ ስር ተደፋ። እኔ ይቅርታ ልጠይቅሽ እያሰብኩ ነበር ፤በፍጹም ልክ እንዳልሆንኩ አውቃለሁ። አንቺን አጥቼ መኖር አልችልም።
ይለኝ ጀመር። የሚለው ነገር ግራ ገባኝ። ሰራተኛችን በር ላይ ስታፀዳ ነበር ፤ወዲያው ሁኔታውን ተመልክታ ተሰወረች። ባለቤቴ ከሰራተኛችን ጋር የተለየ ግንኙነት መጀመሩንና ተሳስቶ እንደሆነ ነገረኝ። ደነገጥኩ፤ተረበሽኩ። እየነገርኩት የነበረው የሰው ሳይሆን እኔ ጠርጥሬው መስሎት ነው። በሰው እውነት ውስጥ ግን የራሴውን ጉድ አረዳኝ።
ከእግሬ ስር አልተነቃነቀም። የሆነው ሁሉ በሰመመን የማየው ቅዠት እንጂ እውነት አልመስልሽ አለኝ። “በድዬሻለው ይቅር በይኝ…የፈፀምኩት ተግባር ፍፁም ስህተት ነው። ለአንቺ ይሄ አይገባሽም ውዴ…በደሌ ለራሴ መሸከም አቅቶኛል። ሥራዬ አንችን ቀና ብዬ እንዳላይሽ እንዳፍር አድርጎኛል።” እያለ እግሬ ስር ተደፍቶ እየደጋገመ ይማፀነኛል።
ሰራተኛችን ከርቀት እቃዋን አንጠልጥላ ወደ በር ስታመራ አየኋት። ባሌ እየነገረኝ ያለው ነገር እውነት ለመሆኑ ሌላ ማስረጃ ሆነኝ።
ቆይቼ እንደምንም እራሴን አረጋግቼ ወደምታለቅሰዋ ልጄ ተጠጋሁና አቅፌ ወደደረቴ አስጠጋኋት። ከአይኖቼ እንባ እንደ ጎርፍ ይፈሳል። አንደበቴ ተሳስሯል። አዕምሮዬ ማሰብ አቁሟል። እግሬ ግን መድረሻውን ባያውቅም ወደ በር እየተራመደ ነው። ተፈፀመ::
አዲስ ዘመን የካቲት 26/2013