ለዲፕሎማቲክ ተቋማት አገልግሎት ታጥረው የነበሩ 12 ቦታዎች አጥር ተነሳ

ቦታዎቹ በቦሌ ክፍለ ከተማ ወረዳ 6 ከቀነኒሳ ሆቴል ጀርባ የሚገኙ ሲሆን፥ እያንዳንዳቸው በአማካይ 2 ሺህ ካሬ ሜትር ያህል ስፋት እንዳላቸው ተነግሯል።

ተቋማቱ ቦታዎቹን እንዲያለሙ ወይም ንብረታቸውን እንዲያነሱ በአዲስ አበባ ከተማ ከንቲባና በኢፌዴሪ የውጭ ጉዳይ ሚኒስቴር፥ በኩል ተደጋጋሚ ውይይት ሲካሄድ መቆየቱን የአዲስ አበባ ከተማ መሬት ባንክ እና ማስተላለፍ ጽህፈት ቤት ዳይሬክተር አቶ በየነ ላምቢሶ ገልጸዋል።

ይሁን እንጅ ተቋማቱ እስካሁን ድረስ ቦታዎችን አለማልማታቸውን እና ንብረታቸውን አለማንሳታቸውን ተከትሎ ውላቸው ተቋርጦ በዛሬው ዕለት አጥራቸውን የማንሳት ስራ መሰራቱን ተናግረዋል።

በመዲናዋ ቦታዎችን ያለ ልማት አጥረው ያስቀመጡ እና ውላቸው ተቋርጦ በዛሬው ዕለት አጥራቸው ከተነሳባቸው የዲፕሎማቲክ ተቋማት መካከል ቱርክ፣ ቤኒን፣ ኮንጎ፣ ዛምቢያ እና ኒጀር ይገኙበታል ተብሏል።

መሬቶችም በአፋጣኝ ወደ ከተማ አስተዳደሩ መሬት ባንክ ገብተው ለህብረተሰቡ ማህበራዊ እና ኢኮኖሚያዊ የልማት ስራዎች ላይ ይውላሉ ነው የተባለው።

በአዲስ አበባ ከተማ ውስጥ ያለ ልማት ታጥረው የተቀመጡ እና ውላቸው የተቋረጡ ቦታዎችን አጥር የማፍረስ ስራ በሚቀጥለው ሳምንት እንደሚጠናቀቅ ተገልጿል ሲል የዘገበው ኤፍ ቢ ሲ ነው።